ऊर्जा खबर
काठमाडौँ । २२.५ मेगावाटको तल्लो बलेफी खोला जलविद्युत् आयोजनाको सुरुङ खन्ने कामअन्तर्गत पहिलो ब्लास्टिङ सफलता पूर्वक सम्पन्न भएको छ । आयोजनाको मुख्य सुरुङको आउटलेटतर्फको सुरुङमा पहिलो ब्लास्टिङ भएको हो ।
सिन्धुपाल्चोकको बलेफी गाउँपालिकामा निर्माणाधीन आयोजनालाई रिडी पावर कम्पनी लिमिटेडले प्रवर्द्धन गरेको छ भने साझा पावर कम्पनी लिमिटेडले निर्माण गरिरहेको छ । काठमाडौँबाट ७२ किलोमिटर दुरीमा रहेको यस आयोजनाको बाँधस्थल बलेफीको जलवीरेमा अवस्थित छ । विद्युत्गृह भने सोही गाउँपालिकाको आँपबोटेमा रहेको छ ।
आयोजनामा ५.५ किलोमिट लम्बाई र ४.६ मिटर व्यास भएको सुरुङ्ग निर्माण हुनेछ । सुरुङ निर्माणअन्तर्गत ‘इन्लेट पोर्टल’को काम जम्बला कन्स्ट्रक्सन प्राइभेट लिमिटेडले गरिहेको छ । त्यसैगरी अडिट सुरुङ निर्माणको जिम्मा देवकोटा निर्माण सेवा प्राइभेट लिमिटेडले लिएको छ । आउटलेटतर्फ त्रिवेणी ब्रम्हायणी जेभीले काम गरिरहेको छ ।
आयोजनाको हेड वर्क्सको काम बन्दना भगवती पोखरेली जेभीले काम गरिरहेको छ । विद्युत गृह बनाउने काम ककनीदेवी निर्माण सेवा प्रालिले गरिरहेको छ ।
आयोजना निर्माणमा ४ अर्ब ४५ करोड रुपैयाँ खर्च हुने अनुमान गरिएको छ । यसमध्ये २ अर्ब ९५ करोड रुपैयाँ बैंकको ऋण र बाँकी रकम स्वःलगानीबाट जुटाइने प्रबन्ध मिलाइएको छ । आयोजनामा कुमारी बैंक लिमिटेडको अगुवाईमा कृषि विकास बैंक र सिटिजन्स बैंक इन्टरनेशनल लिमिटेडको संयुक्त ऋण लगानी छ ।
यस आयोजनामा रिडी पावर कम्पनीको ५५ प्रतिशत, स्थानीय तथा सर्वसाधारणको ३० प्रतिशत र अन्य शेयरधनीको १५ प्रतिशत शेयर लगानी छ । यस आयोजनामा शेयर लगानी गर्न रिडी पावरले हकप्रद सेयरबाट रकम जुटाइसकेको जनाएको छ ।
आयोजनाको निर्माण २०८२ भित्र सम्पन्न गर्ने लक्ष्य कम्पनीले लिएको छ ।
कम्पनीले आयोजना गरेको पहिलो ब्लाष्टिङ समारोहमा नेपाली सेनाको बाहिनीपति, स्थानीय प्रहरी प्रमुख, कम्पनीका अध्यक्ष, संचालकहरू, कर्मचारीहररू, ठेकेदार कम्पनीका प्रतिनिधिहरू, स्थानीय नागरिक लगायत सरोकारवालाको उपस्थिति थियो ।
