ऊर्जा खबर
काठमाडौं । सरकारले सोलुखुम्बुमा पहिचान भएको १७१ मेगावाटको दूधकोसी-६ जलविद्युत आयोजनाका सम्बन्धमा सरोकारवालासँग राय/सुझाव मागेको छ । वन तथा वातावरण मन्त्राललये आयोजनाको वातावारणीय प्रतिवेदन (इआइए) मा आएको विषयमाथि राय/सुझाव मागेको हो ।
मन्त्राललये सोमबार (असोज ३१ गते) सूचना प्रकाशित गरेर ७ दिनभित्र आयोजनाकाे प्रतिवेदनमाथि राय/सुझाव पेश गर्न सम्बन्धित सरोकारवालाहरूमा आग्रह गरेको छ । मन्त्रालयका अनुसार सरोकारवालाबाट आएको उपयुक्त राय तथा सुझावलाई प्रतिवेदन स्वीकृत गर्ने क्रममा समावेश गरिनेछ ।
आयोजना जिल्लाको खुम्बु पासाङल्हामु गाउँपालिका–२ र ३ मा निर्माण हुनेछ । नदी प्रवाहमा आधारित आयोजनाका मुख्य भौतिक संरचनारूमा ग्राभिटी प्रकार डाइभर्सन वेयर, अन्डर, स्लुइस, साइट इन्टेक ग्राभेल ट्रयाक, अप्रोच कल्भर्ट, सेटलिङ बेसिन, हेडरेस टनेल, सर्ज ट्यांक र भूमिगत प्रकारको विद्युतगृह आदि छन् ।
आयोजनाबाट वार्षिक ९३८.९७ गिगावाट आवर (बर्खामा ६५७.१५ गिगावाट आवर र हिउँदमा २८१.८२ गिगावाट आवर) उत्पादन हुनेछ । आयोजनाका संरचनाहरू निर्माणका लागि १०.७६ हेक्टर जग्गा प्रयोग हुनेछ । जसमा सगरमाथा राष्ट्रिय निकुञ्जको मध्यवर्ती वन क्षेत्रको ७.३६ हेक्टर प्रयोग हुनेछ ।
