ऊर्जा खबर
काठमाडौं । लमजुङ र गोरखाको सीमामा निर्माणाधीन ८.६ मेगावाटको चेपेखोला साना जलविद्युत आयोजनाको भौतिक संरचनाको काम ६० प्रतिशत पूरा भएको छ । निर्माण सुरु भएको ११ महिनामा आयोजनाको आधाभन्दा बढी काम सकिएको हो ।
आयोजनाका सबै भौतिक संरचनाको निर्माण एकसाथ अघि बढेको प्रवर्द्धक आशुतोष इनर्जी कम्पनीका अध्यक्ष मोहनबिक्रम कार्कीले बताए । उनका अनुसार सबैभन्दा बढी प्रगति बाँध क्षेत्रमा भएको छ ।
बाँध क्षेत्रका संरचनामा ७० प्रतिशत बढी काम सम्पन्न भइसकेको उनले बताए । ‘निर्माण सुरु गरेदेखि नै बिना अवरोध आयोजनामा काम भइरहेको छ,’ उनले ऊर्जा खबरसँग भने, ‘बाँधपछि विद्युतगृह र पाइपलाइनको निर्माण क्रमशः ५० र २५ प्रतिशत सम्पन्न गरेका छौं ।’
खोलाको पानी विद्युतगृहमा खसाल्न ३३ सय मिटर लामो पाइप लाइन बिछ्याउने काम भइरहेको छ । विद्युतगृहको भौतिक संरचना तयार भएपछि इलेक्ट्रोमेकानिकल उपकरण जडानको काम सुरु हुने कम्पनीले जनाएको छ । आयोजनाको विद्युतगृहमा अष्ट्रियास्थित ग्लोबल हाइड्रो कम्पनीले उत्पादन गरेका इलेक्ट्रोमेकानिकल उपकरण जडान हुँदैछन् ।
कोरोना (कोभिड–१९) महामारीकाबीच पनि बिना अवरोध निर्माण जारी राखिएकाले ११ महिनामै आधाभन्दा बढी काम सकिएको पनि उनले बताए ।२०७७ असोजदेखि आयोजना स्थलमा काम सुरु गरिएको थियो ।
आयोजनाबाट आगामी (२०७८) फागुन ९ गतेदेखि विद्युत उत्पादन सुरु गर्ने तालिका छ । तोकिएको तालिका अनुसार नै आयोजनाले विद्युत उत्पादन सुरु गर्ने कार्कीले बताए ।
आयोजना सम्पन्न भई उत्पादन हुने विद्युत १३२ केभी दोर्दी कोरिडोर प्रसारण लाइनको कीर्तिपुर सबस्टेनमा जोडिनेछ । विद्युगृहदेखि सबस्टेसनसम्म आवश्यक पर्ने २१ किलोमिटर प्रसारण लाइन कम्पनीले नै निर्माण गर्नेछ ।
आयोजना सम्पन्न गर्न १ अर्ब ५० करोड रुपैयाँ लागत अनुमान गरिएको छ । कूल लागतको ७५ प्रतिशत हुन आउने १ अर्ब १२ करोड ५० लाख रुपैयाँ एनएमबी बैंक एक्लैले लगानी गर्न गरेको छ ।
सुपर माई, सुपर माई ‘ए’, सुपर माई क्यासकेडलगायत जलविद्युत आयोजनाको सफल निर्माण गरेको समूहले चेपे खोला पनि निर्माण गरिरहेको हो । यी ३ वटै आयोजना विद्युत प्राधिकरणले दिएको तालिकाभन्दा अगाडि नै सम्पन्न भई प्रसारण प्रणालीमा जोडिएका थिए ।
प्रतिमेगावाट लागतका हिसाबले यो आयोजना करिब १७ करोड ३८ लाख रुपैयाँमा पूरा गर्ने लक्ष्य छ । पछिल्लो समय वित्तीय व्यवस्थापन भएका मध्ये यो सम्भवतः सबैभन्दा सस्तो आयोजना हो । अहिले जलविद्युतको प्रतिमेगावाट लागत २० देखि २५ करोड रुपैयाँसम्म पुगिसकेको छ । आयोजनाबाट वार्षिक ५१.५७ गिगावाट घन्टा (५ करोड १५ लाख ७० हजार युनिट) विद्युत उत्पादन हुनेछ ।
