ऊर्जा खबर
काठमाडौँ । नेपाल विद्युत् प्राधिकरणका २१ वटा सहायक कम्पनीहरूको प्रगति र अवस्थाबारे अध्ययन थालिएको छ । प्राधिकरणका सहायक कम्पनीहरूमा केही वर्षयता अपारदर्शीता र अनियमितता बढेको चर्चा चलिरहँदा प्राधिकरणले समिति नै बनाएर अध्ययन थालेको हो ।
ऊर्जा, जलस्रोत तथा सिँचाइ मन्त्री दीपक खड्काको अध्यक्षतामा तीन साताअघि बसेको प्राधिकरण सञ्चालक समितिको बैठकको निर्णयअनुसार समिति गठन भएको थियो ।
प्राधिकरण सञ्चालक समितिका सदस्य डा. बलबहादुर पराजुलीको संयोजकत्वमा गठित ३ सदस्यीय समितिको सदस्यहरूमा ऊर्जा, जलस्रोत तथा सिँचाइ मन्त्रालयका सहसचिव गोकर्णराज पन्थ र प्राधिकरणकै उपकार्यकारी निर्देशक नवराज ओझा रहेका छन् ।
समितिलाई प्राकिरणका सहायक कम्पनीहरूको अवस्था तथा प्रगतिबारे अध्ययन गरी १ महिनाभित्र सुझावसहितको प्रतिवेदन बुझाउन कार्यादेश (टिओआर) तोकिएको छ ।
अध्ययन समितिले काम सुरु गरेको करिब २० दिन भइसकेको र हालसम्म प्राधिकरणका सबैजसो सहायक कम्पनीको प्रगति र अवस्थाका बारेमा प्रस्तुतिकरण सुनुवाइ गर्ने काम भएको समितिका सदस्य पन्थले ऊर्जा खबरसँग बताए ।
‘करिब सबैजसो कम्पनीहरूको अवस्था र प्रगतिबारे प्रस्तुतिकरण सुन्ने काम भइसकेको छ,’ उनले भने, ‘अब समितिले माग गरे अनुसारको ढाँचामा प्रगति विवरण मागेका छौँ, त्यो आएपछि थप अध्ययनसहित १०/१२ दिनभित्रमा सुझावसहितको प्रतिवेदत तयार पारी समितिले बुझाउने छ ।’
कम्पनीहरूको अवस्था र प्रगतिबारे अध्ययन गर्ने क्रममा गम्भीर समस्या देखिए थप तथा विस्तृत अध्ययन समेत हुन सक्ने उनको भनाइ छ ।
प्राधिकरणका सहायक कम्पनीहरू
१. चिलिमे जलविद्युत् कम्पनी लिमिटेड
२. रसुवागढी हाइड्रोपावर कम्पनी लिमिटेड
३. साञ्जेन जलविद्युत् कम्पनी लिमिटेड
४. मध्य भोटेकोसी जलविद्युत् कम्पनी लिमिटेड
५. अप्पर तामाकोसी हाइड्रोपावर लिमिटेड
६. तामाकोसी जलविद्युत् कम्पनी लिमिटेड
७. रघुगंगा हाइड्रोपावर लिमिटेड
८. तनहुँ हाइड्रोपावर लिमिटेड
९. अप्पर अरुण हाइड्रो–इलेक्ट्रिक लिमिटेड
१०. दूधकोसी जलविद्युत् कम्पनी लिमिटेड
११. मोदी जलविद्युत् कम्पनी लिमिटेड
१२. तमोर पावर कम्पनी लिमिटेड
१३. आँधीखोला पावर कम्पनी लिमिटेड
१४. त्रिशूली जलविद्युत् कम्पनी लिमिटेड
१५. उत्तरगंगा पावर कम्पनी लिमिटेड
१६. एनइए इन्जिनियरिङ कम्पनी लिमिटेड
१७. चिलिमे इन्जिनियरिङ एन्ड सर्भिसेस कम्पनी (चेस्को)
१८. नेपाल पावर ट्रेडिङ कम्पनी लिमिटेड
१९. पावर ट्रान्समिसन कम्पनी नेपाल लिमिटेड
२०. टावर तथा पोल उत्पादन कम्पनी लिमिटेड
२१. ट्रान्सफर्मर उत्पादन कम्पनी लिमिटेड
