ऊर्जा खबर
काठमाडौँ । नेपाल विद्युत् प्राधिकरणले निर्माण गरेको बर्दघाट–सर्दी १३२ केभी डलल सर्किट प्रसारण लाइन सञ्चालन आएको छ । नवलपरासीमा निर्माण भएको उक्त १९ किलोमिटर लामो प्रसारण लाइन चैत ६ गते (मंगलबार)देखि सञ्चालनमा आएको हाे ।
७ वर्षअघिदेखि निर्माण सुरु भएको लाइन आजदेखि सञ्चालनमा आएको आयोजना प्रमुख हरि पाण्डेले बताए । बर्दघाट १३२/११ केभी सस्टेसनदेखि बर्दघाट नगरपालिका–२ र ५ मा पर्ने बन्डा खोला, दाउन्ने धार्मिक वन, घिउ खोला सामुदायिक वन, विनयीत्रिवेणी गाउँपालिका–२, खुमल्टार हुँदै सर्दीमा रहेको होङ्गसी सिमेन्ट उद्योगसम्मको क्षेत्रमा पर्ने प्रसारण लाइन निर्माण गरिएको हो ।
आयोजना प्रमुख पाण्डेका अनुसार यो प्रसारण लाइन सञ्चालनमा आएपछि खासगरी नवलपरासीका औद्योगिक ग्राहकलाई विद्युत आपूर्ति सहज हुनेछ । यो प्रसारण लाइन समयमा पूरा नहुँदा यस चिनियाँ लगानीको ठूलो होङ्सी शिवम् सिमेन्टलाई वैकल्पिक व्यवस्था गरेर लाइन दिनुपरेको थियो ।
होङ्सीले हाल वैकल्पिक व्यवस्था मार्फत लिइरहेको ३० मेगावाट विद्युत् अब यही लाइनबाट लिने छ । यो लाइनबाट होङ्सीले मात्रै मासिक करिब १५ करोड रुपैयाँको बिजुली किनिरहेको छ । उद्योग स्थापनाको चरणमा होङ्सीले यो लाइनबाट कुल ८३ मेगावाट बिजुली लिने प्रतिबद्धता जनाएको थियो । तर, पछिल्लो समय नेपालमा आर्थिक मन्दीका कारण निर्माण क्षेत्र ठप्प हुँदा सिमेन्टको माग घटेको छ । यसले उद्योगहरूले उत्पादन कटौती गर्नुपरिरहेको अवस्था छ । त्यसो हुँदा होङ्सीले पनि क्षमता वृद्धिको योजनालाई थाती राखेको छ ।
ठूला उद्योगमा पानी र बिजुली पुर्याइदिनुपर्ने नीति अन्तर्गत उद्योग मन्त्रालयको बजेट लगानीमा होङ्सी सिमेन्टलाई बिजुली पुर्याउन यो लाइनको निर्माण सुरु गरिएको थियो । २०७४/७५ बाट निर्माण सुरु भएको यो प्रसारण लाइन ७ वर्षमा पूरा भएको हो । आयोजनाको निर्माण लागत बरिब ६५ करोड रुपैयाँ रहेको आयोजना प्रमुख पाण्डेले बताए ।
