ऊर्जा खबर
काठमाडौं । सिंगटी हाइड्रो इनर्जी कम्पनीको सेयर भर्न पहिलो दिन नै मागभन्दा बढी आवेदन परेको छ । कम्पनीले शुक्रबारदेखि निष्कासन गरेको सेयर भर्न एकै दिनमा मागभन्दा बढी आवेदन परेको हो ।
बिहान १० बजेदेखि सेयर बिक्री खुलाइएकोमा ३ घन्टामै निष्कासन भएको सबै कित्ताका लागि आवेदन परेको कम्पनीका सञ्चालक बटु लामिछानेले बताए । ‘दिउँसो १ बजेसम्ममा लगानीकर्ताबाट मागभन्दा बढी आवेदन आयो’, उनले ऊर्जा खबरसँग भने, ‘पहिलो दिनमै आवेदनकर्ताको उत्साहजनक सहभागिता देखियो ।’
अपरान्ह ४ बजेसम्ममा कम्पनीको सेयर खरिद गर्न २ लाख २७ हजार जनाको आवेदन परेको पनि उनले बताए । आवेदनबाट पहिलो दिनमा ३७ करोड २६ लाख रुपैयाँ बराबरको सेयर आवेदन परेको छ ।
लगानीकर्ताको शुक्रबारको उत्साहले सेयर आवेदन दिने पाउने अवधिभर मागभन्दा ५/६ गुणासम्म आवेदन पर्ने सम्भावना देखिएको उनले बताए । कम्पनीले दोलखामा निर्माण सम्पन्न २५ मेगावाटको सिंगटी खोला जलविद्युत आयोजनाको सर्वसाधारणका लागि छुट्याएको सेयरको बिक्री बिहानबाट खुलाएको छ ।
प्रतिकित्ता सय रुपैयाँ अंकित २९ करोड रुपैयाँ बराबरको २९ लाख कित्ता सेयर निष्कासन गरिएको कम्पनीले जनाएको छ । निष्कासन भएको सेयरमध्ये ५८ लाख रुपैयाँ बराबरको ५८ हजार कित्ता अर्थात २ प्रतिशत सेयर कम्पनीमा कार्यरत कर्मचारीका लागि सुरक्षित गरिएको छ ।
१ करोड ४५ लाख रुपैयाँ बराबरको १ लाख ४५ हजार कित्ता अर्थात ५ प्रतिशत सेयर सामूहिक लगानी कोषका लागि छुट्याइएको छ । बाँकी २६ करोड ९७ लाख रुपैयाँ बराबरको २६ लाख ९७ हजार कित्ता सेयर सर्वसाधारणका लागि खुल्ला गरिएको कम्पनीले जनाएको छ ।
सर्वसाधारणले न्युनतम १० कित्तादेखि अधिकतम २ लाख कित्तासम्म आवेदन दिन पाउनेछन् । आवेदकले छिटोमा चैत्र १० गतेसम्म र ढिलोमा चैत्र २० गतेसम्म आवेदन दिन पाउनेछन् ।
कम्पनीले सेयर निष्कासन गरी बाँडफाँड गर्न मेगा क्यापिटललाई बिक्री प्रबन्धक तोकेको छ । कम्पनीले यसअघि पनि आयोजना प्रभावित स्थानीयका लागि छुट्याएको १४ करोड ५० लाख रुपैयाँ बराबरको १४ लाख ५० हजार कित्ता सेयर निष्कासन गरी बाडफाँड गरिसकेको छ । स्थानीयका लागि छुट्याइएको सेयरका लागि पनि मागभन्दा बढी आवेदन परेको थियो ।
कम्पनीले लगानी गरेको सिंगटी खोलाको निर्माण सम्पन्न भई परीक्षणसमेत सकिएको छ । १३२ केभी सिंगटी–लामोसाँघु प्रसारण लाइन पूरा भइनसकेकाले आयोजनाको विद्युत प्रणालीमा जोडिन सकेको छैन ।
प्रसारण लाइनको काम अन्तिम चरणमा पुगेकाले चालू आर्थिक वर्षभित्र आयोजनाबाट विद्युत उत्पादन सुरु हुँदैछ । आयोजना सञ्चालनमा आएपछि विद्युत बिक्रीबाट वार्षिक ७० करोड रुपैयाँ आम्दानी हुनेछ ।
