ऊर्जा खबर
काठमाडौं । नेपाल विद्युत प्राधिकरणको सहायक तनहुँ हाइड्रो पावर लिमिटेडले निर्माण गरिरहेको १४० मेगावाटको तनहुँ जलविद्युत आयोजनाको विकास कार्यक्रमअन्तर्गत निर्माण सम्पन्न भएको सराङघाट सबस्टेसनकाे उद्घाटन गर्ने कार्यक्रम तय भएको छ । तनहुँको बन्दिपुर गाउँपालिका वडा नम्बर ६ मा निर्माण सम्पन्न भएको ३३/११ केभीको सराङघाट सबस्टेसन सोमबार (चैत ६ गते) उद्घाटन गर्ने कार्यक्रम तय भएको हो ।
सबस्टेसन सञ्चालनमा आएको करिब एक महिनापछि उद्घाटन गर्न लागिएको कम्पनीले जनाएकाे छ । सबस्टेसन उद्घाटन कार्यक्रममा प्राधिकरणका कार्यकारी निदेर्शक कुलमान घिसिङसहितका उच्च पदाधिकारीहरू हुनेछन् ।
जलविद्युत आयोजनाको सामाजिक विकास कार्यक्रमअन्तर्गत निर्माण भएको सबस्टेसनको काम पूरा गरी फागुन २ गतेदेखि सञ्चालनमा छ । यस्तै, तनहुँको आँबुखैरेनी गाउँपालिकास्थिति मार्कीचोक सबस्टेसनदेखि बन्दिपुर गाउँपालिकाको डुम्रेसम्मको ३३ केभी प्रसारण लाइनलाई ट्यापिङ गरिएको छ । लाइन माघ २७ गते चार्ज गरिएको थियो ।
प्रसारण लाइनलाई बन्दीपुर गाउँपालिका वडा नम्बर ५ याम्पाफाँटमा ट्यापिङ गरी सराङघाट सबस्टेसनसम्म पुर्याउने १९ किलोमिटर लामो ३३ केभी लाइन पनि निर्माण गरिएकाे छ । यसमध्ये ११३० मिटर लामो प्रसारण लाइनलाई भूमिगत गरिएको छ ।
प्राधिकरणको आयोजना व्यवस्थापन निर्देशनालयमार्फत कार्यान्वयन भएको ‘तनहुँ ग्रामीण विद्युतीकरण तथा वितरण सञ्जाल सुधार आयोजना’ मार्फत लाइन र सबस्टेसन निर्माण गरिएको हाे ।
तनहुँ जलविद्युत आयोजनाको सामाजिक विकास कार्यक्रमअन्तर्गत आयोजना प्रभावित तनहुँ जिल्लामा विद्युतीकरण गर्न र विद्युत आपूर्तिलाई पर्याप्त, भरपर्दो तथा गुणस्तरीय बनाउन सबस्टेसन र प्रसारण लाइन निर्माण गरिएको हो । आयोजना अन्तर्गत कै तनहुँको शुक्लागण्डकी नगरपालिका-५ स्थिति खैरेनीटार सबस्टेसनबाट घिरिङसम्म १९ किलोमिटर ३३ केभी प्रसारण लाइन र ३३्/११ केभीको घिरिङ सबस्टेसन पनि सञ्चालित छ ।
सराङघाट सबस्टेसनमा ६/८ एमभिए क्षमताको पावर ट्रान्सफर्मर राखिएको छ । स्थानीय रुपमा विद्युत आपूर्तिका लागि सबस्टेसनबाट ११ केभीका तीन वटा फिडर लाइन निकालिएको छ । सबस्टेसनमार्फत तनहुँको आँबुखैरेनी, बन्दिपुर र देवघाट गाउँपालिकामा विद्युत आपूर्ति हुनेछ । यसबाट त्यस क्षेत्रका उपभोक्ताहरुले भरपर्दो र गुणस्तरीय विद्युत आपूर्ति पाउने छन ।
दुई वटा सबस्टेसन निर्माण तथा तनहुँको विद्युतीकरणका लागि इष्ट इन्डिया उद्योग/वाइवा इन्फ्राटेक जेभीसँग २०७५ मंसिरमा ठेक्का सम्झौता भएको थियो । ग्रामिण विद्युतीकरण अन्र्तगतका सम्पूर्णहरू चालू आर्थिक वर्षभित्रमा सम्पन्न गर्ने लक्ष्य राखिएको छ । नेपाल सरकार तथा विद्युत प्राधिकरणको लगानी र एसियाली विकास बैंकको सहुलितपूर्ण ऋणमा आयोजना कार्यान्वयनमा ल्याइएको हो ।
