ऊर्जा खबर
काठमाडौँ । मोदी जलविद्युत् कम्पनी लिमिटेडले कास्कीमा १२.२ किलोमिटर लामो प्रसारण लाइन निर्माण गर्ने भएको छ । उक्त १३२ केभी सिङ्गल सर्किट प्रसारण लाइनबाट ६०.२ मेगावाटसम्म विद्युत् प्रसारण गर्न सकिने गरी निर्माणको प्रस्ताव गरिएको हो । यसका लागि अनुमति पत्रको माग गर्दै कम्पनीले विद्युत् विकास विभागमा आवेदन दिएको छ ।
जिल्लाको अन्नपूर्ण गाउँपालिका– १० मा निर्माणाधीन ४२ मेगावाटको माथिल्लो मोदी–ए जलविद्युत् आयोजनाको स्विचयार्डदेखि सोही पालिकामा निर्माणाधीन माथिल्लो मोदी जलविद्युत् आयोजनाको स्विचयार्ड हुँदै पर्वतको मोदी गाउँपालिका– २ मा नेपाल विद्युत् प्राधिकरणबाट निर्माणाधीन न्यू मोदी सबस्टेसनसम्म पुग्ने गरी लाइन निर्माण गरिने भएको हो ।
प्रस्तावित लाइन निर्माण तथा सञ्चालन गर्दा उल्लेखनीय प्रतिकूल असर पर्ने भए ३५ दिनभित्र विभाग वा प्रवर्द्धक कम्पनीमा आफ्नो लिखित राय प्रतिक्रिया दिन विभागले सूचना प्रकाशित गरेको छ ।
सूचना अनुसार २३ वटा टावरहरू निर्माण गरिने लाइनमा टावरको उचाइ अधिकतम ५० मिटरसम्म रहने तथा टावरहरू बीचको दूरी ४०.५९ मिटरदेखि ६९९.५६ मिटरसम्म रहने छ । आयोजना निर्माणका लागि कुल १६.१०४९ हेक्टर जमिन आवश्यक पर्ने छ । प्रसारण लाइन निर्माण २४ महिनाभित्र सक्ने लक्ष्य राखिएको छ ।
