ऊर्जा खबर
काठमाडौँ । नलगाड हाइड्रो पावर कम्पनी लिमिटेडले ७.१ मेगावाटको ताक्सुखोला जलविद्युत् आयोजना निर्माण गर्ने भएको छ । कम्पनीले कर्णाली प्रदेशअन्तर्गत जाजरकोटको नलगाड नगरपालिकाको ताक्सु खोलामा पहिचान भएको उक्त आयोजना निर्माण गर्न लागेको हो ।
प्रस्तावित आयोजनाको काम अघि बढाउन विद्युत् विकास विभागमा आवेदन दिएको कम्पनीले जनाएको छ । कम्पनीका अनुसार विभागबाट स्वीकुत प्राप्त भए लगतै आयोजनाको काम अघि बढाइनेछ ।
ताक्सु खोलाको बाँया किनारमा मुख्य संरचनाहरू पर्ने गरी डिजाइन तयार गरिएकाे छ । प्रस्तावित आयोजना निर्माण तथा सञ्चालन गर्दा उल्लेखनीय प्रतिकुल असर पर्ने भएमा सूचना प्रकाशित भएको ३५ दिन भित्रमा सरोकारवालालाई राय/सुझाव पेश गर्न आग्रह गरेको छ ।
प्रस्तावित आयोजनाको मुख्य संरचनाहरू ताक्सु खोलाको बायाँ किनारामा पर्ने गरि निर्माण गरिनेछ । २ वटा ३६८५ किलोवाट क्षमताको होरिजेन्टल एक्सिस पेल्टन टर्वाइनहरूमा पानी खसाली सो टर्वाइनसँग जोडिएका २ वटा ४१७६ केभिए को ३ फेज जेनेरेटर मार्फत विद्युत् उत्पादन गरिनेछ । आयोजनाबाट वार्षिक ४०.९५ गिगावाट घण्टा विद्युत उत्पादन हुने अध्ययनले देखाएको छ ।
आयोजनाबाट उत्पादित विद्युत् ३३ केभी प्रसारण लाइन मार्फत १ किलोमिटरको दुरीमा रहेको नेपाल विद्युत् प्राधिकरणको चौखा सबस्टेसनमा जोडिनेछ ।
आयोजनाको काम आगामी ३ वर्ष भित्रमा सम्पन्न गर्ने लक्ष्य राखिएको छ । आयोजना निर्माण गर्दा भूक्षय, वायु प्रदुषण आदिद्वारा वातावरण्मा उल्लेखित प्रतिकुल असर नपर्ने गरी निर्माण गरिनेछ ।
