ऊर्जा खबर
काठमाडौं । स्वतन्त्र ऊर्जा उत्पादकहरूको संस्था, नेपाल (इपान), इन्टरनेशनल सेन्टर फर हाइड्रोपावर (आइसिएच) र अन्तराष्ट्रिय वित्त निगम (आइएफसी) को सहआयोजनामा दिगो वित्तीय उपकरण व्यवस्थापन सम्बन्धी दुई दिने तालिम सम्पन्न भएको छ ।
काठमाडौंको मेरियट होटलमा असोज २९ र ३० गते आयोजना गरिएको उक्त कार्यक्रममा नवीकरणीय ऊर्जामा काम गरिरहेका २८ जना प्रशिक्षार्थीहरूको सहभागीता थियो ।
तालिमको उद्घाटन सत्रमा बोल्दै इपानका अध्यक्ष गणेश कार्कीले ऊर्जा उद्यमीहरूको क्षमता वृद्धिका लागि आइसिएच र अन्तर्राष्ट्रिय वित्त निगम (आइएफसी) सँगको सहकार्यमा आयोजना गरिएको तालिमले नवीकरणीय ऊर्जाका लागि वित्तीय व्यवस्थापनमा सहयोग पु¥याउने विश्वास व्यक्त गरे ।
कार्यक्रमलाई सम्बोधन गर्दै आइसिएचकी प्रबन्ध निर्देशक लिने अम्लुन्ड हेगनले नवीकरणीय ऊर्जाको दिगो वित्तीय व्यवस्थापनका लागि यो तालिम आयोजना गरिएको बताइन् ।
सामाजिक–पर्यावरण द्वन्द व्यवस्थापन विषयक ५ दिने तालिम
यसैगरी, इप्पान र आइसिएचकै सहकार्यमा नवीकरणीय ऊर्जा परियोजनामा सामाजिक–पर्यावरण द्वन्द व्यवस्थापन सम्बन्धी ५ दिने तालिम पनि केही दिनअघि मात्र सम्पन्न भएको छ ।
चन्द्रागिरी हिल्स रिसोर्ट काठमाडौंमा असोज २२ देखि २६ गतेसम्म आयोजना भएको तालिममा स्थानीय र पर्यावरण सम्बन्धी द्वन्द व्यवस्थापनका बारेमा आइसिएचका तर्फबाट विभिन्न कार्यपत्रहरु प्रस्तुत गरिएका थिए ।
तालिममा नेपालको ऊर्जा क्षेत्रमा सक्रिय १५ जना र फिलिपिन्सका ३ जना ऊर्जा उद्यमीहरूको सहभागीता थियो । सहभागीहरूलाई इपानकी सचिव कविता पोखरेलले प्रमाणपत्र वितरण गरेकी थिइन् । इपान र आइसिएचबीच विगत डेढ दशकदेखि नवीकरणीय ऊर्जा क्षेत्रका विविध विषयमा सहकार्य हुँदै आएको छ ।
