ऊर्जा खबर
काठमाडौं । काभ्रेपलाञ्चोकको रोशी गाउँपालिकामा केन्द्रिय प्रसारण लाइनबाट विद्युत वितरण गरिएको छ । गाउँपालिकाको वडा नम्बर ११ स्थित कालढुङ्गामा केन्द्रीय प्रसारण लाइन जडान गरी विद्युत आपूर्ति गरिएको हो ।
गाउँमा केन्द्रिय लाइनको विद्युत पुगेपछि १३५ परिवारले २४सै घन्टा बिजुली बाल्न पाएका छन् । गाउँपालिकाका अध्यक्ष दिनेश लामाले एमसिबी बक्समा ‘स्वीच अन’ गरेर उद्घाटन गरे । लामाका अनुसार उक्त वडामा केही समयअघि ३८ परिवारकामा केन्द्रिय विद्युत् लाइन जोडिसकिएको थियो । ‘१७३ घरमा केन्द्रिय प्रसारण लाइन जडान भइसक्यो, अब वडामा बाँकी आठ घरमा छिट्टै पुर्याउनेछौ’, लामाले भने ।
यसअघि सो वडाका बासिन्दाले लघुविद्युतबाट बिजुली बाल्दै आएका थिए । केन्द्रीय प्रसारण लाइन जडान भएपछि स्थानीय निकै खुसी भएका छन् । राष्ट्रिय प्रसारण लाइन जडान हुँदा दिनरातै विद्युत् आउने भएपछि कुटानी पिसनानीका लागि अन्यत्र जानु नपर्ने तथा उद्यमसमेतका लागि निकै उपयोगी भएको स्थानीय रामबहादुर लामाले बताए ।
पाँच करोडमा ठेक्का लगाइए पनि हाल शाखा लाइन विस्तारका लागि तीन करोड रुपैयाँ खर्च भएको गाउँपालिकाले जनाएको छ । उद्घाटन कार्यक्रममा नेपाली कांग्रेस रोशी गाउँ कार्यसमितिका सभापति दुधराज लामा र वडाध्यक्ष लालकुमार पाख्रिनले वडामा बाँकी परिवारलाई केन्द्रीय प्रसारण लाइन विस्तारका लागि निरन्तर काम भइरहेको बताए ।
