ऊर्जा खबर
काठमाडौँ । सिन्धुपाल्चोकको मेलम्ची नदीमा आएको बाढीबाट पीडितहरूको राहत तथा नदीको तटवन्धका लागि सरकारले तत्काल कार्यक्रम ल्याउने भएको छ । ऊर्जा जलस्रोत तथा सिँचाइ मन्त्री दीपक खड्काले बाढी प्रभावित क्षेत्र सिपाघाट, भीमटार, बाहुनेपाटी, मेलम्ची बजार तथा हेलम्बुको वैशाख २९ गते स्थलगत अवलोकन गरेका थिए । अवलोकनबाट फर्किए लगत्तै मन्त्री खड्काको निर्देशनमा वर्षायाम सुरु हुनुअगावै काम गर्नका लागि १६ करोड रकम बराबरको व्यवस्था गरी तत्काल ठेक्का खोल्न निर्देशन दिएका हुन् ।
सिँचाइ विभागका उपमहानिर्देशक सन्तोष कैनीले बाढी प्रभावित क्षेत्रमा तत्काल काम गर्न प्राप्त भएको निर्देशन अनुसार केही दिनभित्रै १६ करोडको ठेक्का खोल्ने र कामको गति बढाउने बताए ।
सिन्धुपाल्चोक प्रतिनिधि सभा २ बाट निर्वाचित सांसद मोहनबहादुर बस्नेतको आग्रहमा बाढी प्रभावित क्षेत्रको स्थलगत क्षेत्रमा मन्त्री खड्कासहित राज्यमन्त्री खमबहादुर गर्वुजा, सिँचाइ सचिव सरिता दवाडी, सिँचाइ विभागका महानिर्देशक सञ्जिव बराल, उपमहानिर्देशक सन्तोष कैनी लगायतको टोली उक्त क्षेत्रको अवलोकनमा पुगेका थिए ।
२०७८ असार १ मा गएको विनाशकारी बाढीपछि मेलम्ची र हेलम्बु क्षेत्र मुख्य प्रताडित बनेको थियो भने बाढीले सिपाघाटसम्म क्षति पु¥याएको थियो ।मेलम्चीको बाढीले तिम्बु बजार, किउल बजार, चनौटे, ग्याल्थुम, तालामाराङ र मेलम्ची बजार नराम्ररी क्षति भएको थियो । हजारौँ रोपनी जग्गा बगाएको थियो । अर्बौँको धनजनको क्षति भए पनि सरकारले पर्याप्त ध्यान नदिदाँ बाढी प्रभावित क्षेत्रको विकासमा खासै काम हुन सकेको थिएन ।
सरकारका प्रधानमन्त्री, खानेपानी मन्त्रीदेखि भौतिक मन्त्रीहरू पटक पटक मेलम्ची पुगे पनि कुनै काम हुन सकेको थिएन । पहिलो पटक स्थलगत अवलोकनमा पुगेका खड्काले बिजुली गतिमा काम गर्न निर्देशन दिँदै तत्काल वर्षायामबाट हुने क्षति रोक्न तत्काल १६ करोड बराबरको ठेक्का लगाएर काम गर्न निर्देशन दिएपछि काम अघि बढ्न लागेकाे हाे ।
सांसद बस्नेतले मन्त्री खड्कालाई उक्त कार्यका लागि सिन्धुपाल्चोकवासीको तर्फबाट धन्यवाद समेत दिएका छन् । राहत पाइने र तटबन्धको काम हुने भएपछि यस क्षेत्रका स्थानीयले समेत खुसी व्यक्त गरेका छन् ।
