ऊर्जा खबर
काठमाडौं । भारतको इन्डियन आयल कर्पोरेसन (आईओसी) ले नेपालमा पेट्रोलियम पदार्थको मूल्य पुन बढाएर पठाएको छ । आईओसीले जेठ २ गते (सोमबार) पेट्रोलियम पदार्थको मूल्य बढाएर पठाएको हो ।
नेपाल आयल निगमले भारतीय निगमसँग किन्ने पेट्रोलको मूल्य प्रतिलिटर १९२.९४ रुपैयाँ पुगेको छ । यसअघि निगमले भारतबाट खरिद गर्ने पेट्रोलको प्रतिलिटर १८४.०२ रुपैयाँ थियो ।
साथै, डिजेलको खरिद मूल्य १८८.३३ रुपैयाँ पुगेको छ भने मट्टितेलको मूल्य १४०.३६ रुपैयाँ पुगेको निगमले सार्वजनिक गरेको विज्ञप्तीमा उल्लेख छ । आईओसीले पठाएको नयाँ खरिद मूल्य अनुसार निगमले १५ दिनमा करिब साढे चार अर्ब रुपैयाँ घाटा ब्यहोर्नुपर्ने देखिएको छ ।
आइओसीले पठाएको नयाँ मूल्यअनुसार पेट्रोलमा प्रति लिटर २२.९४ रुपैयाँ र डिजलमा ३५.३३ रुपैयाँ घाटा हुने निगमले जनाएको छ । खाना पकाउने एलपी ग्यासमा निगमलाई प्रति सिलिण्डर १०५०.१८ रुपैयाँ घाटा छ । यसका कारण आगामी १५ दिनमा करिब ४ अर्ब ४९ करोड रुपैयाँ घाटा हुने देखिएको निगमले जनाएको छ ।
यसअघि मे १ मा आईओसीले पठाएको मूल्यअनुसार निगम १५ दिनमा ५ अर्ब १९ करोड रुपैयाँ घाटा रहेको बताउँदै गत शनिवार (बैशाख ३१ गते) रातिदेखि लागु हुने गरी प्रतिलिटर १० रुपैयाँ बढाएको थियो ।
निगमलाई मट्टितेल र हवाई इन्धनमा भने नाफा छ । मट्टितेलमा प्रतिलिटर १२.६४ रुपैयाँ र हवाई इन्धनमा (आन्तरिक तर्फ) प्रतिलिटर ५.४५ रुपैयाँ र बाह्य तर्फ ६०.०१ रुपैयाँ नाफा छ ।
भारतबाट बढेर आएसँगै नेपालमा पनि फेरी पेट्रोलियम पदार्थको मूल्य बढ्ने संकेत देखिएको छ । तर निगमले यस सम्बन्धी कुनै निर्णय गरेको छैन ।
