इङ्वा हाइड्रोको सेयर निष्कासन गर्न बाेर्डकाे अनुमति, दुई साताभित्र जारी गर्ने

काठमाडौं । नेपाल धितोपत्र बोर्डले इङ्वा हाइड्रो पावर लिमिटेडको १८ लाख कित्ता साधारण सेयर निष्कासन गर्न अनुमति दिएको छ । बोर्डले आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न अनुमति दिएको हो ।

सय रुपैयाँ अंकित १८ करोड रुपैयाँ बराबरको १८ लाख कित्ता साधारण सेयर निष्कासन अनुमति पाएको कम्पनी सचिव गोकुल पाण्डेले बताए । ‘बोर्डले बुधबार (फागुन ३ गते) सेयर निष्कासन अनुमति दिएको छ,’ उनले ऊर्जा खबरसँग भने, ‘अब दुई साताभित्र पहिलो चरणमा आयोजना प्रभावित स्थानीय र वैदेशिक रोजगारीमा भएका नेपाली नागरीकहरूका लागि सेयर निष्कासन गरिनेछ ।’ दास्रो चरणमा सर्वसाधारणका लागि सेयर निष्कासन हुनेछ ।

कम्पनीको सेयर निष्कासन गरी बाँडफाँड गर्न नेपाल एसबीआई मर्चेन्ट बैकिङ लिमिटेडलाई बिक्री प्रबन्धक तोकिएको छ । कम्पनीको पाँचथरमा ९.७ मेगावाटको इङ्वा खोला जलविद्युत आयोजना निर्माणाधीन छ् । आयोजनाको काम अन्तिम चरणमा पुगेको छ ।