ऊर्जा खबर
काठमाडौं । नेपाल विद्युत प्राधिकरणले शुक्रबार विद्युत महसुल संकलन काउन्टर बन्द गर्ने भएको छ । प्राधिकरणले विश्वकर्मा पूजा परेको हुनाले सबै आय संकलन केन्द्र बन्द गर्न लागेको हो ।
नो लाइट, सबस्टेसन वा अत्यावश्यक कार्यबाहेक सम्पूर्ण प्रशासनिक सेवा र आय संकलन काउन्टर बन्द गर्न लागिएको प्राधिकरणले जनाएको छ । प्राधिकरणका अनुसार अनलाइनबाट हुने विद्युत महसुल भुक्तानी सेवा भने बन्द हुने छैन् ।
देशभरका वितरण केन्द्रका अत्यावश्यक बाहेक सबै प्रशासनिक सेवा, विद्युत महसुल संकलन काउन्टर दिनभरी बन्द रहनेछ । प्राधिकरणका वितरण केन्द्रहरुले निषेधाज्ञा खुलेपछि महसुल संकलन कार्य तीव्र पारेका छन् । महसुल तिर्न अटेरी गर्ने ग्राहकको लाइन काटेर असुल्ने कार्य पनि भइरहेको छ ।
वितरण केन्द्रहरूले विशेष टोली बनाएर लाइन सुधार, ग्राहक सेवा, बक्यौता असुली तथा चुहावट नियन्त्रण अभियानको काम गर्दै आएका छन् ।
