ऊर्जा खबर
काठमाडौं । लमजुङमा ५४ मेगावाटको सुपर दोर्दी ‘ख’ जलविद्युत आयोजना निर्माण गरिरहेको पिपुल्स हाइड्रो पावर कम्पनीको सेयर आवेदन खुल्ला भएको छ । कम्पनीले आयोजना प्रभावित स्थानीयका लागि छुट्याएको साधरण सेयर आवेदन खुल्ला गरेको हो ।
कम्पनीको जारी पूँजी ३ अर्ब २० करोडको २५ प्रतिशत अर्थात ८० करोड रुपैयाँ बराबरको सय रुपैयाँ अंकित ८० लाख कित्ता सेयर निष्कासन गरेको कम्पनीले जनाएको छ । कम्पनीका अनुसार प्रभावित क्षेत्रका स्थानीयका लागि जारी पूँजीको १० प्रतिशत अर्थात ३२ लाख कित्ता, अति प्रभावित क्षेत्र दोर्दी गाउँपालिकाका वडा नम्बर ६ र ७ (तत्कालिन ढोढेनी र फलेनी गाविस) का स्थानीयका बासिन्दाहरुका लागि ३० प्रतिशत अर्थात ९ लाख ६० हजार कित्ता र लमजुङ जिल्लाका स्थानीय बासिन्दाका लागि ७० प्रतिशत अर्थात २२ लाख ४० हजार कित्ता सेयर निष्कासन गरिएको हो ।
स्थानीयले न्यूनतम १० कित्ता देखि अधिकत्तम १ लाख कित्ता सम्म आवेदन दिन पाउने कम्पनीले जनाएको छ । आवेदकले छिटोमा भदौ असोज १४ गते र ढिलोमा असोज ३० गतेसम्म आवेदन दिन पाउनेछन् ।
कम्पनीको सेयर निष्कासन गरी बाँडफाँड गर्न सानिमा क्यापिटललाई बिक्री प्रबन्धक तोकिएको छ । लगानीकर्ताले ग्लोबल आईएमई बैंकको दोर्दी र भोर्लेटार तथा हिलेको एक्टेन्सन काउण्डर, एनएमबी बैंकको भोटेवडा शाखा, सिद्धार्थ बैंकको बेसीशहर शाखा र सिभिल बैंकको भुलभुले शाखाबाट आवेदन दिन सक्नेछन् ।
कम्पनीले निर्माण गरिरहेको आयोजनाको काम अन्तिम चरणमा पुगेको छ । ८८ प्रतिशत बढी निर्माण पूरा भएको आयोजनाबाट आगमी माघभित्र उत्पादन सुरु गर्ने लक्ष्य छ ।
.jpg)
