२८ किस्तामा बक्यौता महसुल बुझाउन उद्योगीलाई प्राधिकरणको सूचना

काठमाडौँ । नेपाल विद्युत् प्राधिकरणले डेडिकेटेड फिडर र ट्रंक लाइनको बक्यौता महसुल अधिकतम २८ किस्तामा बुझाउन नयाँ सूचना जारी गरेको छ । प्राधिकरण सञ्चालक समितिको असार २६ गतेको ९७६औँ बैठकले गरेको निर्णय अनुसार उक्त सूचना जारी गरेको प्राधिकरणले जनाएको छ । २०७२ माघदेखि २०७५ वैशाखसम्म विद्य्त उपभोग गरेका ग्राहकले किस्ताबन्दीमा महसुल तिर्न उक्त सुविधा पाउने प्राधिकरणले जनाएको छ । 

१५ दिनको म्याद दिएर महसुल तिर्न असार १० गते प्राधिकरणले पत्राचार गरे पनि महसुल नबुझाएको भन्दै प्राधिकरणले असार २५, २६ र २७ गते ६ वटा उद्योगको लाइन काटेको थियो । रिलायन्स स्पिनिङ मिल्स, घोराही सिमेन्ट, अर्घााखाँची सिमेन्ट, जगदम्बा सिन्थेटिक, हुलास स्टिल र जगदम्बा स्टिल उद्योगको लाइन काटेको थियो ।

उद्योगीहरूले भने नियमअनुसार उद्योगीले उक्त अवधिमा विद्युत् खपत गरेको प्रमाण नबुझाएसम्म महसुल नतिर्ने अडान राख्दै आएका छन् । उनीहरूले लाइन काटिएका ६ उद्योगमा पुन लाइन सुचारु नगरे सोमबारदेखि आफैँले विद्युत् सेवा बहिष्कार गर्ने चेतावनीसमेत दिएका छन् । 

डेडिकेटेड फिडर र ट्रंक लाइनको बिजुली प्रयोग गरेका ६१ वटा उद्योगले जरिवानासहित करिब ८ अर्ब २५ करोड ९७ लाख रुपैयाँ तिर्नुपर्ने प्राधिकरणको भनाइ छ ।