जुम्लामा लघुजलविद्युतको विद्युतगृह भासिँदा ३ जनाकाे ज्यान गयाे

काठमाडौं । जुम्ला जिल्लामा स्थानीयबासीले सञ्चालन गरिरहेको एक लघुजलविद्युत आयोजनाको विद्युतगृह भासिँदा एकै परिवारका ३ जनाको ज्यान गएकाे छ । हिमा गाउँपालिका–१ आचार्य लिहीस्थित ३० किलाेवाटकाे भित्री खोलाको बाँध भासिँदा उक्त घटना घटेको हो ।

ज्यान गुमाउनेमा त्यहाँ कार्यरत चौकीदार गोरकबहादुर रावतकी श्रीमती र दुई छोरा परेका छन् । त्यो क्षेत्र नेपाल विद्युत प्राधिकरणभन्दा निकै टाढा रहेको र विस्तृत जानकारी थाहा भइनसकेको जुम्ला वितरण केन्द्रका प्रमुख नरेशदत्त रावलले बताए । यद्यपि, जिल्ला प्रहरी कार्यालय जुम्लाका अनुसार ३० वर्षीय विमला रावत तथा उनका छोराहरू ९ र ८ वर्षका भरत र सूर्य घटनामा परेका छन् ।

गए राति ठूलो पानी परेको र विद्युतगृहमा पानी लैजाने कुलोमा घाँस दाउरा जम्मा हुँदा त्यसले बाँधमा दबाब पर्न गई भासिएको अनुमान गरिएको छ । राति अन्दाजी साढे २ बजेतिर घटना भएको तर गाउँलेले बिहान ४ बजेतिरमात्र थाहा पाएलगत्तै प्रहरी घटनास्थल पुगेको थियो । शवहरू पोस्टमार्टमका लागि कर्णाली स्वास्थ्य विज्ञान प्रतिष्ठान ल्याउने तयारी भइरहेको जनाइएको छ ।