ऊर्जा खबर
काठमाडौं । मध्यभोटेकासी जलविद्युत कम्पनीको प्रमुख कार्यकारी अधिकृतमा रामगोपाल शिवाकोटी नियुक्त भएका छन् । उनी खुल्ला प्रतिस्पर्धाका आधारमा कम्पनीको प्रमुख कार्यकारी अधिकृत बनेका हुन् ।
प्रतिस्पर्धाका आधारमा छनोट भएका शिवाकोटीलाई कम्पनीको सञ्चालक समितिले सोमबार कार्यकारी प्रमुखमा नियुक्त गरेको हो । बंगलबारबाट कार्यालयमा उपस्थित भई काम सुरु गरेको शिवाकोटीले बताए ।
‘सोमबार नियुक्ती पाएं । मंगलबारबाटै कार्यालयमा उपस्थित भई काम सुरु गरेको छ्,’ उनले ऊर्जा खबरसँग भने, ‘मेरो २ वर्षे कार्यकालमा १०२ मेगावाटको मध्यभोटेकोसी जलविद्युत आयोजना सम्पन्न गरी नयाँ आयोजनासमेत अघि बढाउने गरी काम गर्नेछु ।’
शिवाकोटी प्राधिकरणमा ३० वर्ष सेवा गरेर अवकास भएका कर्मचारी हुन् । उनले यही अवधिमा चिलिमे जलविद्युत कम्पनीको कार्यकारी प्रमुख भई २८ महिना काम गरेका थिए ।
उनले पञ्चेश्वर आयोजनामा पनि काम गरेका थिए । प्राधिकरणबाट अवकास भएपछि पनि उनले मेलम्ची खानेपानी आयोजनाको अन्तर्राष्ट्रिय परामर्शदातासँग काम गरेका थिए ।
मणिराज काफ्लेले राजिनामा दिएपछि कम्पनी कार्यकारी प्रमुख बिहिन बनेको थियो । चिलिमेका कार्यकारी निर्देशक शुभाष मिश्रले मध्यभोटेकासीको जिम्मेवारी हेर्दै आएका थिए । कम्पनीको कार्यकारी प्रमुखको जिम्मेवारीमा आएका शिवाकोटीको काँधमा ५० प्रतिशत निर्माण पूरा भएको आयोजना सम्पन्न गर्नुपर्ने जिम्मेवारी छ । मध्यभाेटेकाेसी चिलिमेकाे सहायक कम्पनी हाे ।
