ऊर्जा खबर
काठमाडौं । अप्पर लोहरे खोला हाइड्रो पावर कम्पनी लिमिटेडले असार ७ गतेदेखि साधारण सेयर जारी गर्ने भएको छ । कम्पनीले पहिलो चरणमा प्रभावित स्थानीय र वैदेशिक रोजगारीमा गएका नेपाली नागरिकका लागि छुट्याएको सेयर निष्कासन गर्न लागेको हो ।
जारी पूँजीको ४९ प्रतिशतश अर्थात २४ लाख ९८ हजार ४० कित्ता साधरण सेयरमध्येको जारी पुँजी २० प्रतिशत अर्थात ५ करोड ९ लाख ८० हजार ४ सय रकम बराबरको सय रुपैयाँ अंकित ५ लाख ९ हजार ८ सय ४ कित्ताको ५० प्रतिशतश हुने अर्थात २ लाख ५४ हजार ९०२ कित्ता सेयर आयोजनाबाट अति प्रभावित नौमुले गाउँपालिका वडा नम्बर ३ का स्थानीयवासीहरुका लागि र ५० प्रतिशत अर्थात २ लाख ५४ हजार ९०२ कित्ता सेयर दैलेख जिल्लाको स्थानीयका लागी निष्कासन गर्न लागेको कम्पनीले जनाएको छ ।
कम्पनीको जारी पूँजी ३९ प्रतिशत अर्थात १९ करोड ८८ लाख २ सय ३६ कित्ता साधारण सेयरको १० प्रतिशत अर्थात १ करोड ९८ लाख ८२ हजार ४ सय कित्ता रकम बराबरको सय रुपैयाँ अंकित १ लाख ९८ हजार ८ सय २४ कित्ता सेयर वैदेशिक रोजगारीमा गएका नेपाली नागरिकका लागि निष्कासन गर्ने तयारी गरेको हो ।
प्रभावित स्थानीय र वैदेशिक रोजागरीमा गएका नेपाली नागरिकले न्यूनतम १० कित्तादेखि अधिकतम २५ हजार कित्ता सम्म आवेदन दिन पाउनेछन् । स्थानीयले छिटोमा असार २१ गतेसम्म र ढिलोमा साउन ५ गतेसम्म आवेदन दिन पाउनेछन् भने वैदेशिक रोजगारीमा गएका नेपाली नागरिकले असार २१ गतेसम्म मात्र आवेदन दिन पाउनेछन् ।
कम्पनीको सेयर निष्कासन गरी बाँडफाँड गर्न एनआईसी एसिया क्यापिटल लिमिटेडलाई बिक्री प्रबन्धक तोकिएको छ । कम्पनीको दैलेख जिल्लामा ४ मेगावाटको माथिल्लो लोहरे खोला जलविद्युत आयोजना निर्माणाधीन छ ।
