प्रतिकूल माैसमले विद्युत् अवरुद्ध हुँदा लोडसेडिङको भ्रम सिर्जना नगराैँ : प्राधिकरण

काठमाडौँ । नेपाल विद्युत् प्राधिकरणले लोडसेडिङ भएको भनी सामाजिक सञ्जालहरूमा भ्रम फैलाइएको भन्दै आफ्नो गम्भीर ध्यानाकर्षण भएको जनाएको छ । ‘प्रि–मनसुन’ का कारण सिर्जना भएको प्रतिकूल मौसम तथा हावाहुरीका कारण पोल ढल्नेलगायत समस्याका कारण छोटो समयका लागि विद्युत् अवरुद्ध हुँदा लोडसेडिङ भयो भनेर अतिरञ्जित गरी भ्रम सिर्जना गरिएको प्राधिकरणको भनाइ छ । 

ग्राहकलाई नियमित, गुणस्तरीय र भरपर्दो विद्युत् सेवा उपलब्ध गराउन सदैव प्रतिबद्ध रहेको भन्दै प्राधिकरणले देशभरका वितरण केन्द्रबाट दिनरात निरन्तर काम गरी अवरुद्ध भएका ठाउँमा विद्युत् सेवा यथाशीघ्र सुचारु गर्ने गरिएको समेत जनाएको छ । 

कहीँकतै हावाहुरीले पोल ढलेको, तार लत्रिएको देखिए त्यस्तो ठाउँमा नजान र तार तथा पोल नछुन तथा प्राधिकरणको हटलाइन नम्बर ११५० मा फोन गरी जानकारी गराउन पनि सबैमा प्राधिकरणले आग्रह गरेको छ ।