ऊर्जा खबर
काठमाडौं । लुम्बिनी प्रदेशसभा सदस्य पदका उम्मेदवार बादशाह कुर्मीले सिक्टा सिँचाइको नहर खजुरा गाउँपालिकासम्म पुर्याउने प्रतिवद्धता जनाएका छन् । यस क्षेत्रका धेरै जनता कृषिमा निर्भर भएपनि सिँचाइको पर्याप्त व्यवस्था नभएकोले सिक्टा सिँचाइको नहर यस क्षेत्रका जनताको जमिनसम्म ल्याउने बताएका हुन् ।
परसपुर–गौघाट सडकका कारण जनताले पाइरहेको दुःख अब छिट्टै समाधान गर्ने पनि बताएका छन् । बाँके र बर्दियाका जनतालाई नेपालगन्जसँग जोड्ने सडकको स्तरउन्नतीमा ढिलाई भएका कारण थुप्रै जनताले सास्ती भोग्नु परेको कुर्मीले बताए ।
खजुराले स्थानीय, प्रदेश, संघ र केन्द्रमा सरकार हुँदा समेत त्यो बढाउन नसक्नु दुर्भाग्यपुर्ण अवस्था रहेको उनको भनाइ छ । ‘म गाविस अध्यक्ष भएको बेला चार वटा गाविसले मिलेर त्यो बाटो सुरुवात गरेको थियौं, दुर्भाग्य भनौं तर आजसम्म त्यसको स्तरउन्नती हुन सकेको थिएन’, कुर्मीले भने, ‘खजुराको २ नम्बर वडाबाट २ जना प्रदेश र संघीय सांसद बन्नु भयो, तर उहाँले घर अगाडि बाटो बनाउन सक्नु भएन भने उहाँहरूले यस क्षेत्रमा कति विकास गर्नु भयो भन्ने जनतालाई थाहा छ ।’
खजुरा गाउँपालिकाका जनतासँग भेटघाट गर्ने क्रममा उम्मेदवार कुर्मीले आफुहरू विजयी भएपछि खजुरा क्षेत्रमा रहेका सम्पूर्ण अपुरा भौतिक पुर्वाधारका काम सम्पन्न गर्ने प्रतिबद्धता जनाए ।
खजुरा क्षेत्रको विकासमा लागि कृषिलाई आधुनिकरण र ग्रामिण उद्योगलाई वृद्धि गर्ने योजना सहित काम गर्ने कुर्मीले प्रतिबद्धता जनाएका छन् ।
