कदमाहामा विद्युतीय सवारी चार्जिङ स्टेसन सञ्चालन

काठमाडौं । नेपाल विद्युत प्राधिकरणले कदमाहामा विद्युतीय चार्जिङ स्टेसन सञ्चालनमा ल्याएको छ । प्राधिकरण बोदेबरसाइन बितरण केन्द्रको कार्यक्षेत्र अन्तर्गत सप्तरी जिल्लाको कदमाहा प्रहरी पेट्रोल पम्म नजिकै विद्युतीय सवारी चार्जिङ स्टेसन सञ्चालनमा ल्याएको हो ।

प्रहरी पेट्रोल पम्पमा चार्जिङ स्टेसन निर्माण गरी सञ्चालनमा ल्याएको प्राधिकरणले जनाएको छ । आन्तरिकरूपमा विद्युत खपत बढाउन, पेट्रोलियम पदार्थको आयात घटाउन र विद्युतीय सवारीसाधन प्रयोगमार्फत वातावरणमैत्री यातायात प्रणालीको विकास गर्न चार्जिङ स्टेसन निर्माण गरिएको हो ।

प्राधिकरणले विद्युतीय सवारी साधनको प्रयोगलाई प्रोत्साहन गर्न देशैभरी ५१ स्थानमा छिटो चार्ज गर्न सक्ने अत्याधुनिक चार्जिङ स्टेसन निर्माण गरिरहेको छ । साथै, हरेक चार्जिङ स्टेसनमा १४२ किलोवाट क्षमताको चार्जर, त्यसमा विद्युत आपूर्तिका लागि ५० केभिएको ट्रान्सफर्मर, अनलाइन विलिङ प्रणाली जडान गरिनेछ ।

चार्जिङ स्टेसनमा छिटो चार्ज गर्न मिल्ने ६०-६० किलोवाटका डिसी र २२ किलोवाटका एसी चार्जरहरू राखिनेछन । यसबाट ठूला बससहित तीन वटा सवारी एकसाथ चार्ज गर्न सकिनेछ ।

३ सयभन्दा बढी चार्जरलाई सेवा दिन सक्ने गरी प्राधिकरणको डाटा सेन्टरमा चार्जिङ स्टेसनको सफ्टवेयर राखिनेछ । सबै स्टेसनको कन्ट्रोल काठमाडौंबाट हुनेछ भने सवारी चार्जका लागि ग्राहकले क्यूआर कोड र मोबाइल एपमार्फत बिलको भुक्तानी गर्न सक्नेछन ।