५० मेगावाटको दाना खोलाको काम साढे ३ वर्षमा सम्पन्न गर्ने लालुपाते हाइड्रोको लक्ष्य

काठमाडौं । लालुपाते हाइड्रो पावर कम्पनी लिमिटेडले मनाङ जिल्लाको नासो गाउँपालिका पहिचान गरि अघि बढाएको ४९.९५ मेगावाटको दाना खोला जलविद्युत आयोजनाको काम आगामी साढे ३ वर्षभित्र सम्पन्न गर्ने भएको छ । सम्भाव्यता अध्ययन र प्रारम्भिक वातावरणीय प्रभाव मूल्यांकन प्रतिवेदनको काम अन्तिम चरणमा पुगेको आयोजनाको निर्माण २०८३ साउनभित्र सम्पन्न गर्ने लक्ष्य लिएको हो ।

अहिले आयोजनाको सम्भाव्यता अध्ययन र प्रारम्भिक वातावरणीय प्रभाव मूल्यांकन प्रतिवेदन तयार गर्ने काम अन्तिम चरणमा पुगेको कम्पनीले जनाएको छ । विद्युत विकास विभागले सूचना निकालेर आयोजना कार्यान्वयन गर्दा कुनै प्रतिकूल असर पर्ने भए ३५ दिनभित्र लिखित राय/सुझाव पेस गर्न सरोकारवालालाई आग्रह गरेको छ ।

यसको डिजाइन बहाव ६.०३ घनमिटर प्रतिसेकेण्ड र समग्र हेड ९९६.५० मिटर रहनेछ । विद्युत उत्पादनको लागि दानाखोलाको पानी फर्काइ बनाइने बाँधको कुल लम्बाइ १६.११ मिटर र उचाई ५ मिटर हुनेछ । ३,२३९ मिटरको सुरुङमार्ग निर्माण हुनेछ । आयोजनाको विद्युतगृह भूमिगत हुनेछ ।

आयोजना पूरा वार्षिक सरदर ३०२.२७ गिगावाट घन्टा विद्युत उत्पादन हुनेछ । उत्पादीत विद्युत २२० केभी प्रसारण लाइनमार्फत ३.५ किलोमिटर दुरीमा रहेको नेपाल विद्युत प्राधिकरणको धारापानी सबस्टेसनमा जोडिनेछ ।

आयोजनाको थप जानकारी

आयोजनाको थप जानकारी
आयोजना : दाना खोला
क्षमता : ४९.९५ मेगावाट
प्रवद्र्धक : लालुपाते हाइड्रो पावर कम्पनी लिमिटेड
सुरुङ : ३२३९.१९ मिटर
पेनस्टक : १६२४.१४ मिटर
टर्वाइन : ३ वटा, पेल्टन टर्वाइन
प्रसारण लाइन : १३२ केभी (३.५ किलामिटर)
सबस्टेसन : धारापानी
विद्युत उत्पादन तालिका : २०८३ साउन १ गते
वार्षिक सरदर उत्पादन : ३०२.२७ गिगावाट घन्टा