घिरिङ गाउँपालिकाका ३२६ घरमा बिजुली पुग्यो

तनहुँ (दमौली) । अहिलेसम्म विद्युतीकरण नभएको तनहुँको घिरिङ गाउँपालिकामा बिजुली पुगेको छ । गण्डकी प्रादेशिक कार्यालय अन्तर्गतको लेखनाथ वितरण केन्द्रले त्यहाँ बिजुली पुर्याएको हो ।

गाउँपालिका वडा नम्बर १ र ४ का बन्टार, जगौलीटार र खुम्लिङटारका १०६ घरधुरीमा बिजुली बलेको केन्द्र प्रमुख परितोषकुमार चौधरीले बताए । ‘त्यस क्षेत्रमा अहिलेसम्म बिजुली पुगेको थिएन, हाम्रो प्रयास तथा स्थानीयदेखि सरोकारवाला सबैको सहयोगमा विद्युतीकरण गर्न सफल भएका छौं,’ उनले ऊर्जा खबरसँग भने, ‘४ वटा ट्रान्सफर्मर चार्ज गरी सिंगल फेजका करिब सय मिटर वितरण गरिएको छ ।’

बिजुलीले त्यस क्षेत्रलाई अँध्यारोमुक्त बनाएको गाउँपालिका प्रमुख रनबहादुर रानाले बताए । ‘गाउँपालिकामा निर्वाचित भएर आएदेखि नै म यस क्षेत्रमा विद्युत् ल्याउन लागेको थिए,’ उनले भने, ‘निरन्तरको प्रयासपछि आज सफल भइएको छ ।’

आफू निर्वाचित भएर आएपछि एक हजार ५ सयभन्दा बढी घरधुरीमा विद्युतीकरण भइसकेको उनले बताए । यस्तै, अघिल्लो सातामात्र वडा नम्बर ४ का गड्यौलीटार र नयाँटारका २२० घरधुरीमा बिजुली पुर्याइएको थियो ।

यसैगरी, घिरिङ विद्युतीकरण उपभोक्ता समूहका अध्यक्ष होमबहादुर थापाले गाउँपालिकाले विद्युतीकरणका लागि बजेट विनियोजन गरेको हुँदा काम सफल भएको बताए । गाउँपालिका उपाध्यक्ष सरस्वती सिग्देलले पनि विद्युतीकरणबाट गाउँलेहरूले फाइदा लिनुपर्ने बताइन् ।