ऊर्जा खबर
काठमाडौं । २२.१ मेगावाट विद्युत उत्पादन गरी राष्ट्रिय प्रसारण लाइनमा जाेडेको चिलिमे जलविद्युत कम्पनी लिमिटेडले २० करोड रुपैयाँ खुद नाफा कमाएको छ । कम्पनीले सार्वजनिक गरेको वित्तीय विवरण अनुसार गत आव २०७८/७९ को तुलनामा नाफा बढेको देखिएको हो ।
साउनदेखि असोजसम्मको अवधिमा २० करोड ७८ लाख ८० हजार रुपैयाँ खुद नाफा कमाएको कम्पनीले जनाएको छ । कम्पनीका अनुसार गत वर्ष यही समयअवधिमा २० करोड ३५ लाख ३१ हजार रुपैयाँ नाफा कमाएको थियो ।
कम्पनीले यो अवधिमा जलविद्युत केन्द्रको विद्युत बिक्री गरी ३५ करोड ५८ लाख ३८ हजार रुपैयाँ आम्दानी गरेको छ । गत वर्ष ३५ करोड १६ लाख ७८ हजार रुपैयाँ आम्दानी गरेको थियो । यो आयोजनाले २०६० भदौदेखि निरन्तर विद्युत उतपादन गरिरहेको छ ।
यस्तै, खानी खोला हाइड्रो पावर लिमिटेडले २ करोड ५३ लाख ६ हजार ७ सय ८१ रुपैयाँ मुनाफा आर्जन गरेको छ । कम्पनीको नाफा गत र्षको तुलनामा बढेको हो । गत वर्ष यस समय अवधिमा ७० लाख १९ हजार ८ सय १९ रुपैयाँ खुद नाफा कमाएको थियो ।
कम्पनीले यो अवधिमा खानी खोला जलविद्युत केन्द्रको विद्युत बिक्री गरी ६ करोड ७६ लाख १५ हजार १ सय ४८ रुपैयाँ आम्दानी गरेको छ । गत वर्षको तुलनामा विद्युत बिक्रीबाट भएको आम्दानी बढेको हो । गत वर्ष ४ करोड ५७ लाख ३२ हजार १ सय १ रुपैयाँ आम्दानी गरेको थियो ।
कम्पनीको ४.३६ मेगावाटको टुङ्गुन ठोस्ने खोला जलविुत आयोजना र २ मेगावाटको खानी खोला जलविद्युत आयोजना सञ्चालनमा छन् । यो आयोजनाले निरन्तर रुपमा विद्युत उत्पादन गरिरहेको कम्पनीले जनाएको छ ।
यस्तै, माउन्टेन इनर्जी नेपाल लिमिटेडले पनि २७ करोड ५७ लाख १२ हजार ८ सय १९ रुपैयाँ खुद नाफा कमाएको छ । गत वर्षको तुलनामा कम्पनीको नाफा घटेको हो । गत वर्ष यस समयअवधिमा कम्पनीले २९करोड ६ लाख ७६ हजार ४ रुपैयाँ नाफा कमाएको थियो ।
खुद नाफा घटे पनि कम्पनीको विद्युत बिक्रीबाट भएको आम्दानी भने बढेको छ । यो अवधिमा कम्पनीले विद्युत बिक्रीबाट ४७ करोड २३ लाख ९९ हजार ७ सय २० रुपैयाँ आम्दानी गरेको छ । गत वर्ष यही समय अवधिमा ३८ करोड ७१ लाख ५७ हजार ७ सय ३१ रुपैयाँ आम्दानी गरेको थियो ।
कम्पनीको गुल्मी जिल्लामा ५ मेगावाटको अप्पर होंग्दी खोला जलविद्युत आयोजना सञ्चालनमा छ । यो आयोजनाले २०७१ चैत १ गतेदेखि निरन्तर विद्युत उत्पादन गरिरहेको कम्पनीले जनाएको छ ।
