खानी खोलाको सेयर कारोबार फुकुवा

काठमाडौं । नेपाल स्टक एक्सचेन्ज (नेप्से) ले खानीखोला हाइड्रो पावर कम्पनीको सेयर कारोबार फुकुवा गरेको छ । कम्पनीले नियमितरूपमा वित्तीय विवरण नबुझाएको भन्दै बन्द भएको कारोबार साेमबारदेखि खुलाएकाे हो ।

कम्पनीले अबदेखि नियमितरूपमा वित्तीय वितरण सार्वजनिक गर्ने प्रतिवद्धता जनाएपछि कारोबार फुकुवा गर्ने निर्णय भएको नेप्सेले जनाएको छ । काराेबार खुलेसँगै कम्पनीकाे सेयरमा सकारात्मक सर्किट लागेकाे छ । 

 नेप्सेले लगानीकर्ताको उजुरीपछि वित्तीय विवरण सार्वजनिक नगरेको भन्दै गत २० गतेदेखि खानीखोलाको कारोबार रोकेको थियो ।कारोबार रोक्का भएपछि कम्पनीले गत जेठ २३ गते चालू आर्थिक वर्षको तेस्रो त्रैमाससम्मको वित्तीय वितरण सार्वजनिक गरेको थियो । 

तेस्रो त्रैमाससम्मको वित्तीय विवरणअनुसार कम्पनीलाई ९ करोड ९० लाख ५७ हजार रुपैयाँ खुद घाटा छ । खानी खोलाले ४.३६ मेगावाटको टुंगुनरठोस्ने र २ मेगावाटको खानी खोलाबाट विद्युत उत्पादन गरिरहेको छ । प्रसारण लाइन समस्याले लामो समय पूर्ण क्षमतामा चल्न नपाउँदा खानीखोला घाटामा गएको हो ।

प्रसारण लाइन समस्याकै कारण खानीखोलाले विद्युत बिक्रीबाट हुने ४० करोड रुपैयाँ बराबरको आम्दानी गुमाएको थियो । यही कारण पनि उसको वित्तीय विवरण ऋणात्मक देखिन पुगेको हो । अहिले कम्पनीले सञ्चालन गरेको जलविद्युतगृह पूर्ण क्षमतामा चल्न थालिसकेको छ ।