ऊर्जा खबर
काठमाडौं । ४.४ मेगावाटको राधी स्मल जलविद्युत आयोजना निर्माण गरी सञ्चालनमा ल्याएको राधी विद्युत कम्पनी लिमिटेडले भोली (बुधबार) देखी हकप्रद सेयर जारी गर्ने भएको छ । कम्पनीले संस्थापक तथा आफ्ना सेयरधनी सदस्यलाई हकप्रद सेयर जारी गर्न लागेको हो ।
सय रुपैयाँ अंकित ९५ लाख ३५ हजार ७ सय ६० कित्ता सेयर निष्कासन गर्न लागेको कम्पनीले जनाएको छ । कम्पनीका अनुसार हाल कायम पुँजीको १ बराबर १.४७ को अनुपातमा सेयर निष्कासन गर्न लागिएको हो ।
कम्पनीको सेयर निष्कासन गरी बाँडफाँड गर्न मुक्तिनाथ क्यापिटल लिमिटेडलाई बिक्री प्रबन्धक तोकिएको छ । आवेदकले असोज २५ गतेसम्म आवेदन दिन सक्नेछन् ।
कम्पनीको लमजुङमा ४.४ मेगावाटको राधी स्मल जलविद्युत आयोजना सञ्चालनमा छ । यो आयोजनाले २०७१ जेठ ३१ गतेदेखि निरन्तर विद्युत उत्पादन गरिरहेको छ ।
कम्पनीको विगत वर्षहरुदेखि नै सेयरधनीहरूलाई बोनस, सेयर, नगद लाभांश प्रतिफल दिँदै आएको छ । अहिले दोस्रो बजारमा कम्पनीको सेयर किनबेचलाई आकर्षणको रुपमा हेर्ने गरिएको छ ।
