ग्रीन भेन्चर्सले चैत ८ गतेदेखि ३१ लाख कित्ता सेयर निष्कासन गर्ने

काठमाडौं । ग्रीन भेन्भर्स लिमिटेडले चैत ८ गतेदेखि ३१ लाख २५ हजार कित्ता साधारण सेयर निष्कासन गर्ने भएको छ । कम्पनीले ५२.४ मेगावाटको लिखु–४ जलविद्युत आयोजनाको सर्वसाधारणका लागि छुट्याएको साधारण सेयर निष्कासन गर्न लागेको हो ।

सय रुपैयाँमा अंकित ३१ करोड २५ लाख रुपैयाँ बराबरको ३१ लाख २५ हजार कित्ता साधारण सेयर निष्कासन गर्न लागिएको कम्पनीले जनाएको छ । कम्पनीका अनुसार निष्कासन गर्न लागिएको सेयरमध्ये ९३ हजार ७ सय ५० कित्ता अर्थात ५ प्रतिशत सेयर कर्मचारीहरुका लागि सुरक्षित गरिएको छ । 

यस्तै, १ लाख ५६ हजार २ सय ५० कित्ता अर्थात ५ प्रतिशत सेयर सामुहिक लगानी कोषका लागि सुरक्षित गरिएको छ । बाँकी, २८ लाख ७५ हजार कित्ता सेयरका लागि सर्वसाधारणले आवेदन दिन पाउने कम्पनीले जनाएको छ ।

सर्वसाधारणले न्यूनतम १० कित्तादेखि अधिकतम ५० हजार कित्तासम्मका लागि आवेदन दिन पाउनेछन् । सर्वसाधारणले छिटोमा ११ गतेसम्म र ढिलोमा २२ गतेसम्म आवेदन दिन पाउनेछ ।

कम्पनी यसअघि पनि स्थानीयका लागि सेयर निष्कासन गरीसकेको छ । कम्पनीले निर्माण सम्पन्न गरेको आयोजना सञ्चालनमा छ ।