ऊर्जा खबर
काठमाडौं । बिन्ध्याबासिनी हाइड्रो पावर डेभलपमेन्ट कम्पनीको सेयर आवेदन दिने आज अन्तिम दिन हो । कम्पनीले जेठ २० गतेदेखि सर्वसाधारणका लागि निष्कासन गरेको सेयर आवेदन अवधि आज साँझ ५ बजेबाट सकिन लागेको हो ।
कम्पनीले सर्वसाधारणका लागि सय रुपैयाँ अंकित १५ करोड रुपैयाँ बराबरको १५ लाख कित्ता साधारण सेयर निष्कासन गरेको थियो । कम्पनीका अनुसार निष्कासन हुने सेयर मध्ये ६० हजार कित्ता अर्थात ४ प्रतिशत कर्मचारीहरुको लागि सुरक्षित गरिएको र ७५ लाख कित्ता अर्थात ५ प्रतिशत सेयर सामूहिक कोषका लागि छुट्याएको छ ।
बाँकी रहेको १३ लाख ५६ हजार कित्ता साधारण सेयर सर्वसाधारणका लागि निष्कासन गरिएको छ । सर्वसाधारणले न्यूनतम १० कित्तादेखि अधिकतम १ लाख कित्ता सम्मका लागि आवेदन दिन पाउनेछन् । कम्पनीको सेयर निष्कासन गरी बाँडफाँड गर्न सानिमा क्यापिटल लिमिटेडलाई बिक्री प्रबन्धक तोकिएको छ ।
कम्पनीको २ जलविद्युत आयोजना निर्माण सम्पन्न गरी सञ्चालन गरिरहेको छ । ८.८ मेगावाटको रुदी खोला–ए र ६.६ मेगावाटको रुदी खोला–बी जलविद्युत केन्द्रले विद्युत उत्पादन गरिरहेका छन् ।
