ऊर्जा खबर
काठमाडौं । नेशनल हाइड्रो पावर कम्पनीले आफ्ना सम्पूर्ण सेयरधनीलाई १९.५ प्रतिशत लाभांश दिने भएको छ । कम्पनीको आइतबार (फागुन १ गते) बसेको सञ्चालक समिति बैठकले सेयरधनीलाई हाल कायम रहेको १ अर्ब ३८ करोड ५१ लाख ८६ हजार रुपैयाँ बराबरको चुक्ता पुँजीबाट लाभांश दिने प्रस्ताव गरेको हो ।
सेयरधनीलाई १८.५३ प्रतिशत बोनस सेयर र कर प्रयोजनका लागि ०.९८ प्रतिशत नगद लाभांश दिने प्रस्ताव गरिएको कम्पनीले जनाएको छ । कम्पनीले पहिलो पटक आफ्ना सेयरधनीलाई लाभांश दिन लागेको हो ।
कम्पनीले प्रस्ताव गरेको लाभांश आगामी फागुन ३० गते हुने २५औं वार्षिक साधारणसभाले पारित गरेपछि सेयरधनीले पाउने छन् । सेयरधनीलाई यो लाभांश वितरण गरेपछि कायम हुने आनउने चुक्ता पुँजीको ५० प्रतिशत हकप्रद सेयर निष्कासन गर्ने प्रस्ताव पनि साधारणसभामा जाँदैछ ।
साधारणसभा फागुन ३० गते बिहान ११ बजे भर्चुअल माध्यमबाट गरिने जानकारी कम्पनीले दिएको छ । साधारणसभामा सुनकोसी हाइड्रो पावर कम्पनीलाई प्राप्ति गर्ने प्रस्ताव पनि जाँदैछ । सुनकोसी ४.५ मेगावाटको तल्लो इन्द्रावती जलविद्युत आयोजनाको प्रवर्द्धक हो ।
निर्माणाधीन अवस्थामै अनुमतिपत्र खारेज भएको आयोजना अहिले पुनः नेशनलको स्वामित्वमा आइसकेको छ । कम्पनीले सुनकोसीलाई १ः०.२५ को अनुपातमा सेयर मिलान हुने गरी प्राप्ति गर्न लागेको हो ।
कम्पनीले साधारणसभा र लाभांश प्रयोजनका लागि फागुन १३ गते बुक क्लोज गर्नेछ । फागुन १२ गतेसम्म कायम हुने सेयरधनीले कम्पनीको लाभांश सुरक्षित गर्न पाउने छन् ।
कम्पनीले सिन्धुपाल्चोकमा निर्माण गरेको ७.५ मेगावाटको इन्द्रावती तेस्रो जलविद्युत आयोजना सञ्चालना छ । भोजपुरमा सहायक कम्पनीमार्फत १४.१५ मेगावाटको तल्लो इर्खुवा जलविद्युत आयोजना पनि निर्माण गरिरहेको छ ।
