ऊर्जा खबर
काठमाडौं । नेपाल विद्युत प्राधिकरणले सरुवा तथा पदस्थापन भई तोकिएको समयभित्र सम्बन्धित कार्यालयमा हाजिर नहुने कर्मचारीको विवरण मागेको छ । प्राधिकरण प्रशासन निर्देशनालय, जनसाधन विभाग, कर्मचारी प्रशासन महाशाखा अन्तर्गतको कारबाही शाखाले सरुवापछि हाजिर नहुने तथा काम अवधि समाप्त भएपछि पनि फिर्ता नभएका कर्मचारीको विवरण माग गरेको हो ।
शाखाले सरुवा भएको कार्यालयमा हाजिर नहुने तथा काज फिर्ता नहुने कर्मचारीका सम्बन्धमा कारबाही प्रक्रिया अघि बढाउन विवरण माग गरेको जनाएको छ । जनशाधन विभागले केही दिनअघि सरुवा/पदस्थापन तथा काज अवधि समाप्त भएपछि पनि सम्बन्धित कार्यालयमा नगएका कर्मचारीलाई २४ घन्टाभित्र रमाना लिन निर्देशनसहितको परिपत्र जारी गरेपछि शाखाले पनि त्यस्ता कर्मचारीको विवरण मागेको हो ।
विभागले सरुवा, पदस्थापन तथा काज अवधि पूरा भएका कर्मचारीले तत्काल रमाना लिनु पर्ने र नलिएमा अहिले काम गरिरहेको कार्यालयबाट तलब भुक्तानी तथा हाजिरी रोक्का गर्ने चेतावनी पनि दिएको थियो । विभागको परिपत्रपछि पनि अटेर गरेर बस्ने कर्मचारीको विवरण माग गरी त्यस्ता कर्मचारीमाथि कारबाही प्रक्रिया अघि बढाउने शाखाले जनाएको छ ।
‘परिपत्र तथा सूचनालाई अटेर गरी रमाना नलिने/नदिने, काज फिर्ता नजाने/नपठाउने, हाजिरी रोक्का नगर्ने तथा त्यस्ता कर्मचारीलाई तलब भुक्तानी गर्ने कर्मचारीको विवरण संकलन गर्दैछौं । नामावली संकलन भइसकेपछि प्रचलित कानुन बमोजिम कारबाही प्रक्रिया अघि बढ्छ’ शाखाले जारी गरेको सूचनामा भनिएको छ ।
प्राधिकरणले २ वर्षभन्दा बढी समय एउटै कार्यालयमा बिताएका कर्मचारीको सरुवा तथा पदस्थापना गर्ने गरेकोमा कर्मचारीहरू आफुलाई अनुकुल पर्ने कार्यालय छोडी नयाँ कार्यालयमा हारिज हुँदैनन् । सरुवा, पदस्थापन तथा काज अवधि पूरा भइसकेपछि पनि सम्बन्धित कार्यालयमा हाजिर नहुने कर्मचारीको संख्या बढ्दै गएपछि विभागले गम्भिरता देखाउँदै त्यस्ता कर्मचारीलाई कारबाही गर्ने प्रक्रिया अघि बढाएको हो ।
