८.३ मेगावाट माथिल्लो देउमाई निर्माण हुने, १५ महिनामा विद्युत उत्पादन

काठमाडौं । ८.३ मेगावाटको माथिल्लो देउमाई साना जलविद्युत आयोजना निर्माण हुने भएको छ । इलाम जिल्लाको देउमाई नगरपालिका भएर बग्ने देउमाई खोलामा पहिचान भएको आयोजना वाटर इनर्जी सोलुसनले अघि बढाउन लागेको हो ।

अध्ययन पूरा भएको आयोजनाको उत्पादन अनुमतिपत्र लिने प्रक्रिया अन्तिम चरणमा पुगेको छ । विद्युत विकास विभागले कम्पनीलाई उत्पादन अनुमतिपत्र दिन ३५ दिने सूचना जारी गरेको छ ।

विभागका अनुसार वन तथा वातावरण मन्त्रालयबाट स्वीकृत वातावरणीय प्रभाव मूल्याङकन प्रतिवेदन र आयोजनाको अध्ययन रिपोर्टका आधारमा प्रवद्र्धक कम्पनीलाई उत्पादन अनुमतिपत्र दिने तयारी भइरहेको छ ।

विभागले अनुमतिपत्र जारी गर्नुअघि आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय÷सुझाव मागेको छ । विभागले सूचना जारी भएको मितिले ३५ दिनभित्र प्राप्त हुने गरी राय/सुझाव  पठाउन सरोकारवाल समक्ष आग्रह गरेको छ ।

सरोकारवालाले राय/सुझाव विभाग वा प्रवद्र्धक कम्पनीको कार्यालयमा प्राप्त हुने गरी पठाउन सक्ने विभागले जनाएको छ । आयोजनाको मुख्य संरचना खोलाको दायाँ किनारमा रहने गरी डिजाइन तयार पारिएको कम्पनीले जनाएको छ ।

देउमाई नगरपालिकामा बाँध बाँधी २ हजार ४ सय ८४ मिटर मिटर लामो हेडरेस पाइप र ५ हजार ९ सय ९० मिटर पेनस्टक पाइपमार्फत पानीलाई विद्युतगृहमा पुर्याइनेछ । विद्युतगृहमा जडान भएको २ वटा टर्वाइनमा पानी खसाली सो टर्वाइनमा जोडिएको ३ फेजको जेनेरेटर मार्फत विद्युत उत्पादन गरिनेछ ।

आयोजनाबाट वार्षिक सरदर ४९.४० गिगावाट घण्टा विद्युत उत्पादन गरिनेछ । आयोजनाबाट २०७९ फागुन १६ गतेदेखि विद्युत उत्पादन सुरु हुने गरी प्रस्ताव गरिएको कम्पनीले जनाएको छ ।

आयोजनाबाट उत्पादीत विद्युत ३३ केभी लाइन मार्फत १२ किलोमिटर दुरीमा रहेको नेपाल विद्युत प्राधिकरणको चिसापानी सबस्टेसनमा जोडिनेछ । सबस्टेसनसम्मको आवश्यक प्रसारण लाइन कम्पनी आफैले निर्माण गर्नेछ ।