ऊर्जा खबर
काठमाडौं । अमेरिकी संस्था मिलेनियम च्यालेन्ज कर्पोरेशन (एमसिसी) को अनुदान सहयोगमा एमसिए नेपालले अघि बढाएको उच्च क्षमतायुक्त प्रसारण लाइन आयोजना निर्माणका लागि आह्वान गरिएको बोलपत्र रद्द भएको छ ।
उक्त बोलपत्र प्रक्रियामा प्रसारणलाइन निर्माणका लागि प्राविधिक मूल्यांकनमा पास भएका कम्पनीले आयोजनाको अनुमानित लागत प्रस्तावभन्दा ६० प्रतिशतसम्म बढी लागत प्रस्ताव गरेपछि ठेक्का प्रक्रिया रद्द गरिएको हो ।
अनुमानित लागतभन्दा बढीको प्रस्ताव आएपछि एमसीए–नेपालले एमसीसी हेडक्वार्टरसँग ठेक्का अघि बढाउने वा रोक्ने भन्नेबारेमा सुझाव मागको थियो । एमसिसीले उक्त बोलपत्रको प्रक्रिया रद्द गरी पुनः बोलपत्र आह्वान गर्न सुझाव दिएपछि एमसिसीले ठेक्का रद्द गरेको हो ।
प्राविधिक मूल्यांकनमा पास भएका ठेकेदार कम्पनीले लागत अत्यधिक महँगो प्रस्ताव गरेपछि अर्थमन्त्री रामशरण महतले पनि पुनः बोलपत्र आह्वान गर्न एमसिए नेपालका कार्यकारी निर्देशक खड्गबहादुर विष्टलाई निर्देशन दिएका थिए ।
यस्ताे छ सूचना
एमसिए नेपालले ४०० केभी क्षमताकाे ३१५ किलोमिटर लामो प्रसारणलाइनलाई ३ वटा प्याकेजमा निर्माण गर्ने गरी १२ मंसिर २०७९ मा ठेक्काको सूचना निकालिएको थियो ।
लप्सिफेदी–रातमाटे–न्यु हेटौँडा (११७ किमि) पहिलो खण्ड, रातमाटे–न्यु दमौली (९० किमि) दोस्रो खण्ड र न्यु दमौली–न्यु बुटवल, न्यु बुटवलबाट भारतीय सीमासम्म (१०८ किमि) तेस्रो खण्ड गरी कुल ३१५ किलोमिटर प्रसारणलाइन निर्माण गर्ने गरी ठेक्का प्रक्रिया अघि बढाइएको थियो ।
उक्त आयोजना गत १३ भदौबाट निर्माणको चरणमा प्रवेश गरेको घोषणा एमसिए नेपालले गरेको थियो । निर्माणको चरणमा प्रवेश गरेको ५ वर्षभित्र काम सक्नुपर्ने एमसिसीको प्रावधान रहेको बताइएको छ । उक्त अवधिमा काम नसकिए अनुदान रकम फिर्ता जाने सर्त रहेकाे एमसिसीले बताउँदै आएको छ ।
पहिलो चरणको ठेक्का प्रक्रिया नै रद्द भएपछि अब दोस्रो पटक ठेक्काको प्रक्रिया सुरु गर्नुपर्ने भएका छ । यसका लागि सूचना जारी गरेर प्रस्ताव आवेदन परेपछि प्राविधिक प्रस्ताव मूल्यांककै लागि पनि अर्को ७ महिनासम्म लाग्न सक्ने देखिएको छ । यसले परियोजना लम्बिने देखिएको छ ।
यो परियोजना अन्तर्गत प्रसारणलाइनका लागि ८५६ वटा टावर निर्माण गर्नुपर्नेछ । टावर निर्माणका क्रममा २ लाख १२ हजार रुख काट्नुपर्छ । सरकारी र निजी गरी ८ सय रोपनी जग्गा अधिग्रहणको प्रक्रिया अघि बढाइएको छ । त्यस्तै रुख कटानको स्वीकृति प्रक्रिया पनि अघि बढाइएको छ ।
प्रसारणलाइन निर्माणका लागि २२८ मिलियन डलर (२९ अर्ब ६४ करोड रुपैयाँ) खर्च हुने एसमीए–नेपालको लागत अनुमान छ।
