नबिल बैंक र एसियन पेन्टसबीच च्यानल फाइनान्सिङको सम्झौता

काठमाडौं । नबिल बैंक लिमिटेड र एसियन पेन्टस नेपाल प्रालिबिच च्यानल फाइनान्सिङ सुविधाको लागि सम्झौता भएको छ । च्यानल फाइनान्सिङ सहकार्य सम्बन्धमा सोमबार (२९ गते) दुई पक्षबिच सम्झौता भएको हो । 

बैंकका तर्फबाट प्रमुख कार्यकारी अधिकृत ज्ञानेन्द्रप्रसाद ढुंगाना र एसियन पेन्टसका तर्फबाट कन्ट्री डाइरेक्टर गोपालकृष्ण जीलेले सम्झौता पत्रमा हस्ताक्षर गरेका छन् । 

सम्झौतापत्रमा एसियन पेन्टस् नेपालसँग आवद्ध व्यवसायीहरूले च्यानल फाइनान्सिङको रूपमा थप व्यवसाय विस्तार गर्न चालु पुँजीमा लगानी गर्ने उद्देश्यका लागि आकर्षक ब्याजदर र न्यून धितो अनुपातमा बैंकका देशैभरि फैलिएका शाखा सञ्जालहरूबाट च्यानल फाइनान्सिङ कर्जा उपभोग गर्न पाउनेछन् ।

बैंकसँग आबद्ध हुने एसियन पेन्टसका वितरकहरूले बैंकबाट विशिष्टीकृत सेवा पाउने बैंकका प्रमुख कार्यकारी अधिकृत ढुंङ्गानाले बताए । उनका अनुसार व्यवसाय बिस्तारको लागि आवश्यक पुँजी बैंकमार्फत पाउनेछन् । यो सुविधाले नेपाल राष्ट्र बैंकद्वारा जारी गरिएको चालु पुँजी कर्जा सम्बन्धी मार्गदर्शन अनुरुप नै सम्पूर्ण खरिद बिक्रीको भुक्तानी प्रक्रिया बैंक खाता मार्फत मात्रै हुनेछन् ।

च्यानल फाइनान्सिङका प्रमुख आकर्षण अन्तर्गत आफ्ना वितरकहरूलाई सामान बिक्री गरेको बिल बराबरको पुरा रकम भुक्तानी हुने कर्जा सुविधा उपलब्ध हुने बैंकले जनाएको छ । बैंकले सम्बन्धित व्यवसायीहरूको लागि व्यवसाय विस्तार गर्न अन्य सेवा तथा एसएमई कर्जाहरू समेत सहुलियत दरमा उपलब्ध हुनेछन् ।