ऊर्जा खबर
काठमाडौँ । अपि पावर कम्पनी लिमिटेडले आर्थिक वर्ष २०८१/८२ को तेस्रो त्रैमास (चैत मसान्त) सम्म आफ्नो आम्दानी २५ प्रतिशतले बढाएको छ । कम्पनीले सार्वजनिक गरेको तेस्रो त्रैमासको वित्तीय विवरण अनुसार यस अवधिमा कम्पनीको सञ्चालन आम्दानी १ अर्ब १९ करोड ७ लाख रुपैयाँ पुगेको छ । यो अघिल्लो आर्थिक वर्षको सोही अवधिमा गरेको आम्दानी ९५ करोड १८ लाख रुपैयाँको तुलनामा २५ प्रतिशतले बढी हो ।
त्यस्तै, कम्पनीको सञ्चालन मुनाफा ८७ करोड ७७ लाख रुपैयाँ पुगेको छ । अघिल्लो आर्थिक वर्षमा यस्तो मुनाफा ५१ करोड ५९ लाख रुपैयाँ थियो ।
यो त्रैमाससम्म कम्पनीको खुद नाफा ७ गुणाले बढेर ३५ करोड ३४ लाख रुपैयाँ आर्जन गरेको छ । अघिल्लो वर्षको सोही अवधिमा यस्तो नाफा ४ करोड ४८ लाख रुपैयाँ रहेको थियो ।
कम्पनीको वार्षिक प्रतिशेयर आम्दानी (इपिएस) ७.७६ रुपैयाँमा पुगेको छ । यस कम्पनीको सेयर लगानीकर्ताका लागि यो सकारात्मक सूचक हो ।
कम्पनीको प्रतिसेयर सेयरको बजार मूल्य १७६ रुपैयाँबाट बढेर २७३.०९ रुपैयाँ पुगेको छ । प्रतिशेयर नेटवर्थ १०५.२० रुपैयाँबाट बढेर १०९.८५ रुपैयाँ पुगेको छ । मूल्य–आम्दानी (पिइ) अनुपात ४१ः४४ बाट घटेर ३५ः२० पुगेको छ ।
कम्पनीले सहायक कम्पनीहरूमा १६ अर्ब ६४ करोड रुपैयाँभन्दा बढी पुँजी लगानी गरेको छ । आयोजना निर्माण प्रगति निरन्तर बढ्दै गएको छ, जसले भविष्यमा आम्दानी थप बढ्ने देखिएको छ । कम्पनीको कुल सम्पत्ति १३ अर्ब ६९ करोड रुपैयाँ पुगेको छ ।
६ विद्युत् आयोजना सञ्चालनमा
कम्पनीले हालसम्म ६ वटा विद्युत् केन्द्रहरू व्यावसायिक रूपमा सञ्चालनमा ल्याइसकेको छ । यसले कम्पनीको आन्दानीमा स्थायित्व आउने देखाउँछ । कम्पनीले ८.५ मेगावाटको नौगाड गाड, ८ मेगावाटको माथिल्लो नौगाड गाड, ४ मेगावाटको चन्द्रनिगाहपुर सौर्य विद्युत् आयोजना, १ मेगावाटको ढल्बर सौर्य र १ मेगावाटको सिमरा सौर्य विद्युत् आयोजना सञ्चालनमा ल्याइसकेको छ । त्यस्तै, ४० मेगावाटको माथिल्लो चमेलिया जलविद्युत आयोजनासमेत व्यावसायिक सञ्चालनमा आइसकेको छ ।
