सामुदायिक विद्युतिकरण गर्ने संस्थाहरूको मूल्याङ्कन गरी खारेजी र निरन्तरता दिइने

काठमाडौँ । नेपाल विद्युत् प्राधिकरणले देशका ग्रामीण तथा दुर्गम क्षेत्रमा विद्युत् सेवा प्रदान गरिरहेका सामुदायिक संस्थाहरूको मूल्याङ्कन गरी सोही अनुसार निरन्तरता दिने भएको छ । प्राधिकरण सञ्चालक समितिको २९ गते बसेको बैठकले उक्त निर्णय गरेको हो ।

सामुदायिक संस्थाहरूको उचित मूल्याङ्कन गरी सोही आधारमा सेवालाई निरन्तरता दिने वा त्यस्ता संस्थाहरूबाट सेवा लिइरहेका उपभोक्तालाई प्राधिकरणको ग्राहक कायम गर्ने समेत निर्णय भएको छ । गुणस्तरीय सेवा दिन नसकेका संस्थाहरूको नवीकरण खारेज गर्ने निर्णयसमेत गरिएको जनाइएको छ ।

प्राधिकरणका अनुसार सामुदायिक संस्थाहरूलाई आफ्नो सम्झौता रद्द गर्न र प्राधिकरणसँग ग्राहक कायम गर्न चाहनेहरूलाई निवेदन दिन आग्रह गरिएको छ । गुणस्तरीय सेवा प्रदान गरिरहेका संस्थाहरूको निष्पक्ष मूल्याङ्कन गरी आवश्यकता अनुसार सेवा सम्झौता निरन्तरता दिइने पनि निर्णयमा उल्लेख छ। सेवालाई चुस्त बनाउँदै देशव्यापी रूपमा शतप्रतिशत विद्युतीकरणको लक्ष्य पुर्‍याउने बताइएको छ ।