ऊर्जा खबर
काठमाडौं । एनएमबी बैंक लिमिटेड र हाइड्रो इलेक्ट्रिसिटी इन्भेसमेन्ट एण्ड डेभलपमेन्ट कम्पनी (एचआईडिसीएल) ले ४२ मेगावाटको माथिल्लो मादी ‘ए’ जलविद्युत आयोजनामा लगानी गर्ने भएका छन् । मोदी जलविदुत कम्पनीले कास्कीको अन्नपूर्ण गाउँपालिकामा पहिचान गरेको आयोजना अघि बढाउन लगानी गर्ने भएको हुन् ।
आयोजनामा लगानी गर्न बैंक, एचआईडिसीएल र प्रवद्र्धक कम्पनीबीच सम्झौता भएको छ । सम्झौता अनुसार आयोजनाको कुल लागतको ७० प्रतिशत बैंकको अगुवाइमा एचआईडिसीएलले लगानी गर्ने छ ।
आयोजना सम्पन्न गर्न ९ अर्ब ८ करोड रुपैयाँ लागत अनुमान गरिएको छ । जसमा ६ अर्ब ३६ करोड रुपैयाँ ऋण लगानी रहनेछ । बाँकी स्वपूँजी रहने कम्पनीले जनाएको छ ।
बैंकले हालसम्म ५९९ मेगावाटका ४५ जलविद्युत आयोजनामा लगानी गरेको छ । बैंकले २९ अर्ब रुपैयाँ लगानी गरेको छ । जसमा २७ वटामा लिड बैंक रहेको छ । लगानी भएका मध्ये २३ जलविद्युत आयोजनाको निर्माण सम्पन्न भई सञ्चालनमा आएका छन् । बाँकी २२ जलविद्युत आयोजना निर्माणाधीन छन् ।
