ऊर्जा खबर
काठमाडौं । दैलेख जिल्लाको द्वारी खोलामा ३.७५ मेगावाटको द्वारी खोला स्मल जलविद्युत आयोजना निर्माण गरी सञ्चालनमा ल्याएको भूगोल इनर्जि डेभलपमेन्ट कम्पनी लिमिटेडले फागुन ८ गतेदेखि पहिलो चरणको सेयर निष्कासन गर्ने भएको छ । कम्पनीले प्रभावित स्थानीय र वैदेशिक राजगारीमा गएका नेपाली नागरिकका लागि छुट्याएको सेयर निष्कासन गर्न लागेको हो ।
जारी पूँजीको १० प्रतिशत अर्थात ५ करोड ४४ लाख ५ हजार ३ सय रकम बराबरको सय रुपैयाँ अंकित ५ लाख ४४ हजार ५३ कित्ता साधारण सेयर निष्कासन गर्ने तयारी गरेको कम्पनीले जनाएको छ । कम्पनीका अनुसार निष्कासित सेयर मध्ये आयोजनाबाट अति प्रभावित क्षेत्र नौमुले द्वारी–३ दैलेखमा स्थायी बसोबास गर्ने स्थानीय बासिन्दाका लागि २ लाख ७२ हजार २६ कित्ता सेयर र आयोजनबाट प्रभावित स्थानीयका लागि २ लाख ७२ हजार २७ कित्ता सेयर निष्कासन गर्ने तयारी गरेको हो ।
यस्तै, वैदेशिक रोजगारीका लागि जारी पूँजीको २० प्रतिशत अर्थात १० करोड ८८ लाख १० हजार ७ सय रकम बराबरको सय रुपैयाँ अैकित १० लाख ८८ हजार १ सय ७ कित्ता सेयर मध्येको १ लाख ८ हजार ८ सय ११ कित्ता सेयर निष्कासन गर्नेछ ।
प्रभावित स्थानीय र वैदेशिक रोजगारीमा गएका नेपाली नागरिकले न्यूनत्तम १० कित्ता देखि अधिकत्तम ३० हजार कित्ता सम्म आवेदन दिन पाउनेछन् । स्थानीयले छिटोमा फागुन २५ गतेसम्म र ढिलोमा चैत १२ गतेसम्म आवेदन दिन पाउनेछन् भने वैदेशिक रोनगारीमा गएका नेपाली नागरिकले फागुन २५ गतेसम्म मात्र आवेदन दिन पाउनेछन् ।
कम्पनीको सेयर निष्कासन गरी बाँडफाँड गर्न एन आई सी एशिया क्यापिटल लिमिटेडलाई बिक्री प्रबन्धक तोकिएको छ । कम्पनीले निर्माण सम्पन्न गरेको उक्त आयोजनाले निरन्तर विद्युत उत्पादन गरिरहेको छ ।
