ऊर्जा खबर
काठमाडौं । अपि पावर कम्पनी लिमिटेडको उत्पादन आम्दानी घटेसँगै खुद नाफा पनि घटेको छ । कम्पनीले सार्वजानिक गरेको आर्थिक वर्ष २०७९/८० को दोस्रो त्रैमासको वित्तीय विवरण अनुसार खुद नाफा र आम्दानी घटेको देखिएको हो ।
गत वर्ष जलविद्युत केन्द्रबाट उत्पादित बिजुली बेचेर ३१ करोड ४६ लाख ८६ हजार ४ सय ७० रुपैयाँ आम्दानी गरेको यस कम्पनीले आव २०७९/८० को दोस्रो त्रैमासमा २७ करोड ४२ लाख ५० हजार ३ सय ८८ रुपैयाँ मात्र आम्दानी गरेको वित्तीय विवरणमा उल्लेख छ ।
कम्पनीले यो अवधिमा ६ करोड २३ लाख ९३ हजार ५ सय १३ रुपैयाँ खुद नाफा कमाएको छ । कम्पनीको नाफा गत वर्षको तुलनामा घटेको हो । गत वर्ष यही समयअवधिमा १४ करोड ३० लाख ५० हजार १ सय १६ रुपैयाँ खुद नाफा कमाएको थियो ।
कम्पनीले अन्य स्रोतबाट पनि ५८ लाख ३८ हजार ५ सय ३९ रुपैयाँ आम्दानी गरेको छ । दार्चुलामा निर्माण सम्पन्न ८.५ मेगावाटको नौगड गाढ र ८ मेगावाटको माथिल्लो नौगड गाड जलविद्युत आयोजनाले निरन्तर विद्युत उत्पादन गरिरहेको छ । साथै, सोही जिल्लामा ४० मेगावाटको माथिल्लो चमेलिया निर्माणाधीन रहेको छ ।
