मेरो राजनैतिक चरित्र हत्याको प्रयास गरियोःपुन

काठमाडौं । निर्वतमान ऊर्जा, जलस्रोत तथा सिँचाइ मन्त्री वर्षमान पुनले राजिनामापछि आफ्नो राजनैतिक चरित्र हत्या गर्ने प्रयास भएको भन्दै आपत्ति जनाएका छन् । पुनले मन्त्री पदबाट राजिनामा दिएको भोलिपल्ट सामाजिक सञ्जालमा आफ्नाबारेमा कुप्रचार गरिएकाले त्यसप्रति ध्यानाकर्षण भएको बताएका हुन् ।

उनले सोमबार प्रधानमन्त्री केपी शर्मा ओलीको असंबैधानिक कदमको बिरोध गरेका कारण त्यसबाट डराएकाहरूले आफ्नो राजनैतिक चरित्र बिग्रिने गरी सामाजिक सञ्जालमा जथाभावी लेखिरहेको आरोप लगाएका छन् । उनले मन्त्री पदबाट राजिनामा दिइसकेपछि आइतबार नै मन्त्री निवास छाडेर डेरा सर्ने क्रममा सरकारी सामान नलगेको पनि प्रष्ट पारेका छन् ।

‘म पदबाट राजिनामा दिएकै दिन मन्त्री निवास छाडेर डेरामा सरेको छु,’ उनले साेमबार एक वक्तव्य जारी गरेर भने, ‘डेरा सर्दा सरकारी सामान लगिएको भन्ने गलत आरोप लगाएर कुप्रचार गर्ने प्रयास भएको छ ।’ उनले गलत प्रचार गर्ने क्रम नरोकिए कानुनी प्रक्रियामा जाने चेतावनी पनि दिएका छन् ।

पुनले संसद विघटन गरेर निर्वाचनमा जानु प्रधानमन्त्री ओलीको गलत कदम भएको भन्दै मन्त्रीपरिषद बैठकमा आपत्ति जनाएका थिए । दिउँसो पुनले अन्य मन्त्रीहरूसँगै सामूहिक राजिनामा दिएका थिए । राजिनामापछि मन्त्री निवास छाड्नेक्रममा सरकारी समान पनि लिएर गएको आरोप पुनमाथि लागेको थियो ।