ऊर्जा खबर
काठमाडौं । नेपाल विद्युत प्राधिकरणले १३२ केभी भुमही–हकोई डबल सर्किट प्रसारण लाइन निर्माण गर्ने भएको छ । प्राधिकरणले प्रदेश नम्बर ५ अन्तर्गत नवलपरासी जिल्लामा लाइन निर्माण गर्न लागेको हो ।
जिल्लाको सुनवल नगरपालिकाको चारपालमा रहेको प्राधिकरणको सबस्टेसनदेखि साेही जिल्लाकै रामग्राम नगरपालिकामा प्रस्तावित हकोई सबस्टेसनसम्मको लाइन निर्माण गर्न लागिएको प्राधिकरणले जनाएको छ । प्राधिकरणका अनुसार करिब १४.३६ किलोमिटर लामो लाइन निर्माण गर्न अनुमतिका लागि विद्युत विकास विभागमा आवेदन पेश गरिएको छ ।
विभागले लाइन निर्माण गर्न प्राधिकरणको नाममा अनुमतिपत्र दिने प्रकृया अन्तिम चरणमा पुर्याएको छ । विभागले विद्युत ऐन २०४९ को दफा ४ को व्यवस्था अनुसार विद्युत नियमावली २०५० को नियम १५ बमोजिम प्राधिकरणलाई अनुमतिपत्र दिन लागेको हो । प्राधिकरणलाई अनुमति पत्र दिन विभागले ३५ दिने सार्वजनिक सूचना जारी गरेको छ ।
विभागले अनुमतिपत्र दिनुअघि लाइन निर्माण तथा सञ्चालन गर्दा पर्न सक्ने प्रतिकुल असरबारे सम्बन्धित सरोकारवालासँग राय/सुझाव मागिएको छ । विभाग तथा प्राधिकरणको कार्यालयमा आइपुग्ने गरी सरोकारवालाबाट राय/सुझाव मागिएको छ ।
२ सय मेगावाट विद्युत प्रसारण क्षमता भएका लाइनमा ५१ वटा टावर निर्माण गरिनेछ । लाइनको एक टावरदेखि अर्को टावरसम्मको सरदर दुरी न्यूनतम २ सय देखि अधिकतम ५ सय मिटरसम्म हुनेछ । लाइन निर्माण सुरु भएको ३ वर्षमा सम्पन्न गर्ने प्राधिकरणले जनाएको छ ।
