ऊर्जा खबर
काठमाडौं । बुटवल पावर कम्पनी (बिपिसी) ले आफ्ना सेयरधनीलाई २५ प्रतिशत लाभांश दिने भएको छ । कम्पनीको शुक्रबार बसेको सञ्चालक समिति बैठकले आर्थिक वर्ष २०७६/७७ मा आर्जन भएको मुनाफाबाट सेयरधनी सदस्यलाई लाभांश दिने प्रस्ताव गरेको हो ।
सेयरधनीलाई गत आवको नाफाबाट १० प्रतिशत बोनस सेयर र १५ प्रतिशत नगद लाभांश दिने प्रस्ताव सञ्चालक समितिबाट भएको कम्पनीले जनाएको छ । कम्पनीका अनुसार आगामी पुस २८ गतेका लागि तय भएको वार्षिक साधारणसभाले पारित गरेपछि सेयरधनीले लाभांश पाउने छन् ।
साधारणसभाअघि पुस १६ गतेसम्म कायम सेयरधनीहरूले लाभांश पाउने छन् । कम्पनीले हरेक वर्ष लगानीकर्तालाई लाभांश दिँदै आएको छ ।
कम्पनीको लगानी रहेका १२ मेगावाटको झिमरुक, ९.४ मेगावाटको आँधीखोला र ४ मेगावाटको खुदी जलविद्युत आयोजना सञ्चालनमा छन् ।
सहायक कम्पनीमार्फत ३० मेगावाटको न्यादी र ३६.४ मेगावाटको काबेली ‘ए’ निर्माणाधीन छन् । १३९.२ मेगावाटको तल्लो मनाङ मस्र्याङ्दी, १६० मेगावाटको मुगु कर्णाली, ७.९ मेगावाटको चिनो खोला, मस्र्याङ्दी क्यासकेड आयोजना अघि बढाउने गरी अनुमति पत्र लिएको छ ।
