विद्युत आपूर्त : प्राधिकरण :६८५८ मे.वा.घन्टा / निजी क्षेत्र :५९८३ मे.वा.घन्टा / आयात : १२२२० मे.वा.घन्टा / ट्रिपिङ : मे.वा.घन्टा / ऊर्जा माग :२५०६१ मे.वा.घन्टा/ उच्च माग :१४०८ मेगावाट
×

अहिलेसम्मकै ठूलो अर्धजलाशय आयोजनामा लगानी जुटाइयो, सरकारी बैंककै अगुवाई

२०७७ पुस ८

काठमाडौं । दोलखाको उत्तरी क्षेत्र तामाकोसीको सहायक लाप्चे खोलामा निर्माण हुने १ सय ६० मेगावाटको लाप्चे खोला अर्धजलाशय जलविद्युत् आयोजना निर्माण गर्न लगानी व्यवस्थापन भएको छ । नेपाल बैंक लिमिटेडको अगुवाईमा ४ सरकारी र ५ निजी बैंकले लगानी गर्ने टुंगो लागेको छ ।

व्यापारिक घराना एमभी दुगड समूहको मुख्य लगानी रहेको नासा हाइड्रो पावर प्रालिले निर्माण गर्ने आयोजनामा मंगलबार (पुस ७ गते) लगानी सम्बन्धी सम्झौता भएको हो । २६ अर्ब २० करोड लागत अनुमान गरिएको आयोजनामा ७५ प्रतिशत ऋण र २५ प्रतिशत स्वपुँजी लगानी हुनेछ ।

लगानी सम्झौतामा कम्पनीका अध्यक्ष मोतिलाल दुगड र नेपाल बैंकका प्रमुख कार्यकारी अधिकृत कृष्णबहादुर अधिकारीले हस्ताक्षर गरेका छन् । आयोजनामा लगानी हुने १९ अर्ब ६५ करोड रुपैयाँ ऋण मध्ये ५१ प्रतिशत सरकारी बैंक तथा संस्थाहरूको रहने कम्पनीका अध्यक्ष दुगडले जानकारी दिए ।

कम्पनीका अनुसार नेपाल बैंकले ५ अर्ब, राष्ट्रिय वाणिज्य बैंक र कर्मचारी सञ्चय कोषले २÷२ अर्ब र कृषि विकास बैंकले १ अर्ब लगानी गर्नेछन् । यस्तै, निजी बैंकहरू नेपाल इन्भेष्टमेन्ट बैंकले ३.५० अर्ब, हिमालयन बैंकले २ अर्ब, नेपाल एसबिआई र बैंक अफ काठमान्डूले १÷१ अर्ब र लक्ष्मी बैंकले १ अर्ब ८८ करोड २५ लाख रुपैयाँ लगानी गर्नेछन् ।

यो नेपाल विद्युत् प्राधिकरणले विद्युत् खरिद सम्झौता (पिपिए) गरेको पहिलो अर्धजलाशय आयोजना पनि हो । विद्युत्को उच्च माग हुँदा दैनिक ६ घन्टासम्म पानी सञ्चय गरेर विद्युत् उत्पादन गर्न सकिने अध्यक्ष दुगडले बताए । हाल अध्ययन पूरा भई निर्माणको तयारीमा रहेको आयोजनाबाट २०७९ साउनसम्म विद्युत् उत्पादन गर्ने लक्ष्य छ ।

प्रतिक्रिया