ऊर्जा खबर
काठमाडौं । नेपाल विद्युत प्राधिकरणले २२.१४ मेगावाटको माथिल्लो बलेफी जलविद्युत आयोजनाको थपिएको क्षमताको विद्युत खरिद सम्झौता (पिपिए) गरेको छ । प्राधिकरणले आयोजनाको प्रवर्द्धक मुनलाइट हाइड्रो पावर कम्पनीसँग थपिएको ११.५४ मेगावाटको पिपिए गरेको हो ।
सोमबार पिपिएमा हस्ताक्षर भएको कम्पनीका अध्यक्ष वीरेन्द्र न्यौपानेले बताए । उनका अनुसार बढेको क्षमताको पनि हिउँदमा प्रतियुनिट ८.४० रुपैयाँ र बर्खामा प्रतियुनिट ४.८० रुपैयाँ दरमा विद्युत खरिद गर्ने गरी कम्पनी र प्राधिकरणले सम्झौतामा हस्ताक्षर गरेका छन् ।
‘पलिहे आयोजना १०.६ मेगावाट क्षमतामा निर्माण गर्ने गरी पिपिए गरेका थियौं,’ उनले ऊर्जा खबरसँग भने, ‘काम गर्दै जाँदा २२.१४ मेगावाटमा निर्माण गर्न सम्भव देखिएपछि फेरि थपिएको क्षमताको पनि पिपिए भएको हो ।’ उनले पछिल्लो पिपिएअनुसार अबको २ वर्षभित्र आयोजना सम्पन्न गरेर राष्ट्रिय प्रसारण प्रणालीमा जोड्नुपर्नेछ ।
पहिलो पटक ४ वर्षअघि १०.६ मेगावाटको पिपिएमा हस्ताक्षर भएको थियो । यो क्षमताका लागि पनि हिउँदमा प्रतियुनिट ८.४० रुपैयाँ र बर्खामा प्रतियुनिट ४.८० रुपैयाँमा पिपिए भएको थियो ।
सिन्धुपाल्चोकको बलेफी खोलामा निर्माणाधीन आयोजनाको आधाभन्दा बढी काम सकिएको छ । आयोजनाको बाँध, पाइप लाइन र विद्युतगृहमा काम धमाधम भइरहेको न्यौपानेले जानकारी दिए ।
आयोजना सम्पन्न गर्न ३ अर्ब ८३ करोड रुपैयाँ खर्च हुने अनुमान छ । आयोजनामा नेपाल बंगालादेश बैंकको अगुवाईमा ७ वटा बैंकले ऋण लगानी गरेका छन् । आयोजना सम्पन्न भएपछि १३२ केभी लामोसँघु सबस्टेसनमा लगेर जोडिनेछ ।
सबस्टेसनसम्म आवश्यक १२ किलोमिटर लामो प्रसारण लाइन आफैं निर्माण गर्ने कम्पनीले जनाएको छ । पहिले आयोजनाको विद्युत बाह्रबिसे सबस्टेसनमा लगेर जोड्ने तय भए पनि पछि लामोसँघुमा जोड्ने निर्णय भएको हो ।
.jpg)
