ऊर्जा खबर
काठमाडौं । स्यार्पु पावर कम्पनी लिमिटेडले ३.३ मेगावाटकाे साना जलविद्युत आयोजना निर्माण गर्ने भएको छ । कम्पनीले रुकुम पश्चिम जिल्लाको बाँफीकोट गाउँपालिका वडा नं. ३ (साबिक बाँफीकोट गा.वि.स वडा नं. ८) मा ३.३ मेगावाटकाे साना जलविद्युत आयोजना निर्माण गरी विद्युत उत्पादन गर्न लागेकाे हाे ।
विद्युत विकास विभागका अनुसार अनुमतिपत्र दिन ३५ दिने सूचना जारी गरिएको छ । अनुमतिपत्र दिनु अघि साना जलविद्युत आयोजना निर्माण तथा सञ्चालन गर्दा पर्न सक्ने प्रतिकुल असरबारे सम्बन्धित सरोकारवालासँग राय/सुझाव माग गरेको छ ।
यो आयोजना रन अफ रिभर प्रकारको हुनेछ र यसकाे जडित क्षमता ३.३ मेगावाटको हुनेछ । आयाेजनाकाे डिजाइन बहाव १.४० घनमिटर प्रति सेकेन्ड र कुल हेड २८०.२० मिटरको रहेको छ । यो आयोजनाबाट बार्षिक सरदर १७.७५ गिगावाट घन्टा विद्युतीय ऊर्जा उत्पादन हुनेछ ।
उत्पादित विद्युतलाई विद्युत गृहको ६.६ केभी को स्वीचयार्डमा जडान हुने ४.० एमभीए ट्रान्सफर्मरबाट करिब २ किलोमिटर लामो ३३ केभी प्रसारण लाइन बाँफीकोट सबस्टेसन मार्फत राष्ट्रिय प्रसारण लाइनमा जोडिनेछ । यो आयोजनाबाट १९ महिनापछि विद्युत उत्पादन गरिनेछ ।
