राकाथुम सबस्टेसन चार्ज, खाडादेवी क्षेत्रको विद्युत आपूर्ति सुधार

काठमाडौं । रामेछाप जिल्लाको खाडादेवी र सुनापाती गाउँपालिकाको विद्युत आपूर्ति सुधार गर्नका लागि निर्माण गरिएको ३३/११ केभी राकाथुम सबस्टेसन चार्ज भएको छ । नेपाल विद्युत प्राधिकरणले निर्माण गरेको सबस्टेसनको काम सम्पन्न गरी चार्ज गरिएको हो ।

रामेछापको खाडादेवी र सुनापाती, सिन्धुलीको सुनकोसी गाउँपालिका र काभ्रेपलाञ्चोकको केही स्थानका विद्युत आपूर्ति गुणस्तर र भरपर्दो बनाउन निर्माण गरिएको सबस्टेसन चार्ज भएको हो ।

सबस्टेसनबाट ५ वडा फिडर निकाल्ने गरी निर्माण भइरहेको छ । जसमध्ये एउटा सुनकोसी गाउँपालिका, एउटा काभ्रेपलाञ्चोक र एउटा सुनकोसी–३ जलविद्युत आयोजनामा जानेछ । सुनापाती र खाडादेवी गाउँपालिका यसअघि करिब २५ किलोमिटर दुरीमा रहेको मन्थली सबस्टेसनबाट विद्युत आपूर्ति हुने गरेको थियो ।

फिडर लामो भएपछि सेवा गुणस्तर र भरपर्दो नभएपछि यो सबस्टेसन निर्माण भएको हो । सबस्टेसनमा १६ एमभिएको ट्रान्सफर्मर राखिएको छ । सबस्टेसनको काम ३ वर्षअघिदेखि सुरु गरिएको थियो ।