ऊर्जा खबर
काठमाडौं । सरकारले ३ महिना अवधिमा ७ सय बढी आयोजनाको अध्ययन अनुमति जारी गरेको छ । आयोजना निर्माण गरेर विद्युत उत्पादन गर्न नेपाल विद्युत प्राधिकरण, उत्पादन कम्पनी र निजी जलविद्युत कम्पनीको नाममा अध्ययन अनुमतिपत्र जारी गरेको हो ।
विद्युत विकास विभागले सार्वजनिक गरेको विवरण अनुसार विभिन्न जिल्लामा पहिचान भएको ७२१ मेगावाटका २३ जलविद्युत र सौर्य आयोजनाले अध्ययन अनुमति पाएका छन् । गत कात्तिकदेखि पुससम्मको अवधिमा अनुमतिपत्र जारी गरिएको हो ।
सौर्य ऊर्जाबाट ६९ मेगावाट र जलविद्युतबाट ६४३.८५ मेगावाट विद्युत उत्पादन गर्न अध्ययन अनुमति पत्र वितरण गरिएको छ । विभागले ७ सौर्य आयोजना र १६ जलविद्युत आयोजनाको नाममा अध्ययन अनुमति पत्र जारी गरेको छ ।
उत्पादन अनुमति पाउनेमा मध्ये सबैभन्दा ठुलो ४ सय ९० मेगावाटका अरुण ४ जलविद्युत आयोजना रहेको विभागले जनाएको छ । यो आयोजना नेपाल विद्युत प्राधिकरणले अध्ययन गर्न गत कात्तिक ७ गते अनुमति पाएको हो ।
कात्तिक महिनामा मात्र अरुण ४ सहित ५ सय ८८ मेगावाटका ८ जलविद्युत आयोजनाले अध्ययन अनुमति पाएको विभागले सार्वजनिक गरेको विवरणमा उल्लेख छ । यस्तै, मंसिरमा ४३.८५ मेगावाटका ५ आयोजनाले अध्ययन अनुमति पाएका छन् । पुसमा १२ मेगावाटका ३ आयोजनाले अध्ययन अनुमति पाएका छन् ।
यस्तै, सौर्य ऊर्जाबाट विद्युत उत्पादन गर्न कात्तिक महिनामा १७ मेगावाटका २ आयोजना, मंसिरमा १० मेगावाटका १ आयोजना र पुसमा ४२ मेगावाटका ४ आयोजनाले अध्ययन अनुमति पाएका छन् । यो अवधिमा विभागले उत्पादन अनुमति भने १३१ मेगावाटका ११ आयोजनालाई दिएको छ ।
