ऊर्जा खबर
काठमाडौँ । नेपाल विद्युत् प्राधिकरणले प्रसारण लाइन मर्मतका क्रममा करेन्ट लागेर घाइते भएका एक कर्मचारीलाई साढे १९ लाख रुपैयाँभन्दा बढी क्षतिपूर्ति प्रदान गर्ने निर्णय गरेको छ । सञ्चालक समितिको बुधबारको निर्णयले उक्त निर्णय गरेको हो ।
प्राधिकरणका अनुसार घाइते कर्मचारीलाई उपचार र क्षतिपूर्ति गरी १९ लाख ७८ हजार ३०१ रुपैयाँ उपलब्ध गराइने भएको छ । २०८२ साल चैत ११ गते मेलम्ची वितरण केन्द्र अन्तर्गत मेलम्ची नगरपालिका–१० आम्बोटेमा १५ केभी प्रसारण लाइनको डिस्क पिन बदली गर्ने क्रममा दुर्घटना हुँदा खोटाङ स्थायी घर भएका २५ वर्षीय सन्देश मगर (शेरबहादुर मगर) करेन्ट लागेर गम्भीर घाइते भएका थिए ।
मगरको सुष्मा कोइराला मेमोरियल अस्पतालमा उपचार गरिएको थियो, जसमा ९ लाख ७८ हजार ३०१ रुपैयाँ खर्च भएको थियो । नेपाल विद्युत् प्राधिकरणको ‘विद्युत क्षतिपूर्ति विनियमावली’ अनुसार दुर्घटनाबापतको १० लाख रुपैयाँ क्षतिपूर्ति र उपचारमा लागेको ९ लाख ७८ हजार ३०१ रुपैयाँ गरी कुल रकम स्वीकृत गरिएको छ ।
मगरले यसअघि नै १० लाख रुपैयाँ प्राप्त गरिसकेको र बाँकी ९ लाख ७८ हजार ३०१ रुपैयाँ सम्बन्धित वितरण केन्द्रमार्फत छिट्टै उपलब्ध गराइने जनाइएको छ ।
