ऊर्जा खबर
दार्चुला । भारतले उत्तराखण्डको पिथौरागढ जिल्लामा रहेको धौलीगंगा जलविद्युत् परियोजनाको बाँधको ढोका खोलेको छ । मंगलबार बिहान बाँधको ढोका खोलेपछि महाकाली नदीमा पानीको बहाब बढेको छ ।
महाकालीमा पानीको बहाव बढेपछि जिल्ला प्रशासन कार्यालय दार्चुला र बैतडीले दुवै जिल्लाका तटीय क्षेत्रका बासिन्दालाई सतर्कता अपनाउन आग्रह गरेका छन् । उत्तराखण्डमा रहेको उक्त जलविद्युत् आयाेजनाले सरसफाइ गर्न मंगलबार बाँधको ढोका खोल्ने भन्दै जिल्ला प्रशासन कार्यालय दार्चुला र बैतडीलाई पत्राचार गरेको थियो ।
दार्चुलाका सहायक प्रमुख जिल्ला अधिकारी मोहनसिंह धामीले सूचना जारी गर्दै मंगलबार बिहान ६ बजेदेखि बुधबार बिहान ६ बजेसम्म महाकालीमा जलस्तर बढ्न सक्ने भएकाले व्यास गाउँपालिका–५ धौलाकोटदेखि लेकम गाउँपालिकाको लालीसम्म तटीय क्षेत्रका बासिन्दालाई सतर्ककता अपनाउन आग्रह गरेका हुन् ।
यसैगरी, बैतडीका प्रमुख जिल्ला अधिकारी पुण्यविक्रम पौडेलले महाकालीमा जलस्तर बढ्ने भएकाले तटीय क्षेत्रका बासिन्दालाई सतर्कता अपनाउन आग्रह गरेका छन् । महाकालीको तटीय क्षेत्र पर्ने बैतडीको सेरादेखि कुस्मतघाटसम्मका बासिन्दालाई नदी छेउछाउ नजान अनुरोध गरिएको छ ।
धौलीगंगाको बाँधको ढोका खोलेपछि दार्चुला, बैतडी, डडेल्धुरा र कञ्चनपुर भएर बग्ने महाकाली नदीको तटीय क्षेत्रका बासिन्दालाई नदी छेउछाउमा नजान र सतर्कता अपनाउन आग्रह गर्ने गरिएको छ ।
चारपाङ्ग्रे सवारी चलाउन रोक
महाकालीमा पानीको बहाब बढेपछि महाकाली नदीमा रहेको पक्की पुलमा चार पाङ्ग्रे सवारीसाधन चलाउन रोक लगाइएको छ । महाकालीमा पानीको बहाव प्रतिसेकेण्ड १ लाख २ हजार ७ सय ४२ क्युसेक पुगेपछि मंगलबार बिहानैदेखि ४ पाङ्ग्रे सवारीसाधन आवागमनमा रोक लगाइएको जिल्ला प्रहरी कार्यालय कञ्चनपुरका सूचना अधिकारी प्रहरी नायब उपरीक्षक सागर बोहराले जानकारी दिए ।
सोमबार उक्त पुल भएर चारपाङ्ग्रे सवारीसाधन चलाउन रोक लगाइएको थियो । महाकालीमा पानीको बहाब प्रतिसेकेण्ड १ लाख क्युसेक पुग्ने बित्तिकै चारपाङ्ग्रे सवारी आवागमनमा रोक लगाउने गरिन्छ ।
अहिले महाकाली नदीमा पानीको बहाव बढ्दै गएको छ । जल तथा मौसम विज्ञान विभागको बाढी पूर्वानुमान महाशाखाका अनुसार अहिले दार्चुलाको दत्तुमा पानीको बहाब सतर्कताको बिन्दु नजिक पुगेको छ ।
